Nongstoiñ, Naitung 06
Ka lympung ïalehkai phutbol ba la tip kum ka District Level Subroto Mukherjee Cup Football Tournament 2026 ba la pynlong da ka shlem treikam jong ka District Sports Officers (DSO), West Khasi Hills ka la jam sha ka semi final.
Ha ka jingïalehkai quarter final jong ka U-17 ki shynrang kaba la long ha ka lah sngi U Blei, ka St Anthony’s SS Jaidoh ka la khur ïa ka jingjop hadien ba ka la pynliem noh da 2-1 kol ïa ka St Peter’s Hr SS. Katba ka Sib Singh Memorial Govt. HSS ka la pynliem noh ïa ka Presbyterian HSS lyngba ka tie-breaker da 3-0 kol hadien ba ki la kut ha ka jingïakhaid mar shi kol.
Shuh shuh sa kawei pat ka jingïalehkai ka Dapboklang Giri ka la jop da 5-3 kol lyngba ka tie-breaker ïa ka Bording Memorial SS hadien ka jingïakhaid khlem don ba lah ban thep kol, katba ka Jidon Sing Memorial SS ka la khur ïa ka jingjop hadien ba ka la pynliem noh ïa ka Bethel Presbyterian HSS da 1-0 kol.
Na ka liang ka shlem treikam ka DSO ka la pyntip ba ïa ki jingïalehkai semi final ha ka sngi Ba-ar ha ka U-15 ki khynnah shynrang bad ki U-17 jong ki khynnah kynthei yn pynlong ha madan New Nongstoiñ.
