Shillong, Naitung 07
Ka Meghalaya ka la khur ïa ka takma ba nyngkong ha ka lympung ïalehkai 14th Senior National Pencak Silat Championship 2026, da kaba ka la ïoh artylli ki takma ksiar na ka kyrdan ïakhun jong ka artistic (seni).
Ka sngi kaba ar jong ka jingïakhun balai sngi ka long ba ka kynhun ïalehkai ka Meghalaya ka la pyrshang ruh ba kan kham paw wat ha ka kyrdan ïakhun jong ka combat (tanding).
Ha kane ka lympung kaba la long ha SAI Training Centre, la wan ïashim bynta da kumba 1,500 ngut ki nongïalehkai na ki 36 tylli ki jylla bad ki Sports Board jong ka ri. Ïa kane ka lympung la pynlong da ka Indian Pencak Silat Federation (IPSF) ryngkat bad ka Meghalaya Pencak Silat Association (MPSA).
Haba phai sha ka jingïakhun ki khynnah ka Jylla, u Anthony Shadap ula long uwei napdeng ki nongïalehkai uba la lah ban jam sha ka pre-quarter final, hadien ba ula pynliem noh ïa u Benjamin Lalrindika na Mizoram. Katba ka Sunita Klein ka la pynliem noh ïa ka Sanooja K na Kerela ha ka jingïakhun jong ki kynthei.
Ka Anisha Phangcho ka la jam sha ka pre-quarter hadien ba ka khur tang shi point ha ka jingïakhun pyrshah ïa ka nongïalehkai ka Uttar Pradesh.
Ïa kane ka lympung yn pynkut ha ka sngi Balang ha kaba u kongsan un dei u Bah Mayralborn Syiem, MLA ka Nongpoh bad uba bat kum u Chairman ka Meghalaya State Health Advisory Board.
