Itanagar, Naitung:
Ka jingïalap paidbah halor ka jingnohsynñiang na ka bynta ban ïarap ïa ki lanot shlei um ba la pynlong da ka Recovering Warriors, ka kynhun kaba ju don bynta ha ki kam pyllait im, ka la lah ban pynmih haduh T.89,094 na ka bynta ki longïing kiba la shah ktah ha ka jingshlei um kaba dang shen ha Keyi Panyor distrik jong ka Arunachal Pradesh.
Ïa kane ka jingïalap paidbah la sdang na Oyan Main Market ha ka 3 tarik u Naitung, ïa kaba la bteng ha Ruksin Main Market ha ka 4 tarik, Naitung bad la pynkut ha Pasighat Main Market ha ka 5 tarik, Naitung, ha kaba la lum ïa u synñiang lyngba ka pisa bad ki Digital Payment.
Katkum ka jingïathuh jong ki nongpynïaid, ka Pasighat ka la ïoh lum kham bun ïa ka pisa kaba la kot sha ka T.38,471, bud sa T.28,340 ha Oyan bad T.22,283 ha Ruksin.
Ïa kane ka pisa la aiti sha u Additional Deputy Commissioner jong ka Ruksin ha Siang distrik bad hadien kata la pynkynriah sha ka Deputy Commissioner, ka Keyi Panyor district Relief Fund ban kyrshan ïa ki jingïarap bad ki jingïarap ba kongsan na ka bynta ki longïing kiba la shah ktah ha ka jingshlei um.
U nongmihkhmat jong ka Recovering Warriors u Mohan Tamut u la ai khublei ïa ki nongshong shnong jong ka Oyan, Ruksin, Pasighat bad ki jaka ba marjan kiba la noh synñiang sha kane ka jingïalap paidbah.
