Imphal, Naitung:
Ha kawei ka jingjia, ba sngewsih, arngut ki shipai jong ka tnat Assam Rifles ki la shah pynïap bad katto katne ngut kiwei pat ki la mynsaw ha ka lah sngi U Blei hadien ka jingthombor jong ki lehnoh hajan Nungshangkong ha Ukhrul distrik, kaba hap hapoh ka jingpeit jong ki pulit ka Ukhrul Police Station.
Ka Sorkar Manipur ka la pynrem jur ïa kane ka kam thombor bad pynthikna ba ka jingkhynra ka dang ïaid shakhmat ban ïoh kem ïa ki nongleh kam sniew.
U Lat ka jylla u Ajay Kumar Bhalla, u Myntri Rangbah ka jylla u Yumnam Khemchand Singh, bad u Myntri ka tnat ki kam pohïing ka jylla u Govindas Khonthoujam ki la pynpaw ïa ka jingsngewsih kaba jur bad ki la pynpaw ruh ïa ka jingsngewlem kaba khraw sha ki longïing kiba la duh noh ïa kiba ïeid bathoiñ jong ki.
U Lat ha ka rynsan social media u la pynpaw ïa ka “jingduh kaba khraw ïa ki arngut ki shipai Assam Rifles kiba shlur,” da kaba pynskhem ba kum kine ki kam shyrkhei kim don jaka ha ka imlang sahlang bad kim lah ban pyntlot ïa ka jingkut jingmut lang ban pynneh pynsah ïa ka jingïada.
Haba pynkynmaw ïa kine ki jingsngew, u Myntri Rangbah ka jylla u la pynbna ba ka sorkar jylla “kan ym sah kum ka nongpeitkai kaba sngap jar” bad u la byrngem ba ïa ki nongleh kam sniew yn pynngat kloi ha ki kyndon jong ka aiñ.
U Khonthoujam u la duwai ruh na ka bynta ka jingkoit jingkhiah jong kiba mynsaw bad u la pynpaw biang ïa ka jingshimkhia ba skhem jong ka jylla ban pynneh pynsah ïa ka suk ka saiñ.
Ki nongïalam jong ki jylla ki la kyntu ïa ki paidbah ban ïeng tylli ban burom ïa ka jingaiti kaba kut jong ki shipai bad ban pynskhem biang ïa ka jingkular lang jong ki ban pynïoh biang ïa ka jingsuk, jingshngaiñ, bad jingiatylli kaba neh ha kylleng ka Manipur.
Ki bor pahara jong ka ri, ki la ïathuh ba ka Government of the People’s Republic of Nagaland (ïa kaba la tip ruh kum ka Government of the People’s Republic of Nagalim), ka kynhun ha ki kam saiñ pyrthei jong ka seng National Socialist Council of Nagaland-Isak-Muivah (NSCN-IM), ka la donkti ha kane ka kam thombor.
Ha kaba ïadei bad kane ka jingkynnoh, kane ka kynhun ka la kyntait pyrshah ba ka la donkti ha kane ka kam thombor kaba la jia ha ka 6 tarik, Naitung.
