Nongstoiñ, Naitung 07
Ka Anderson HSS bad ka Kyrshai Govt.LP&UPS ki la rung sha ka final ha ka U-15 ki shynrang jong ka lympung ïalehkai District level Subroto Mukherjee Cup Football Tournament 2026 ba la pynlong da ka shlem treikam ka District Sports Officers (DSO) West Khasi Hills.
Ka jingïoh rung ka Anderson ka la wan hadien ba ka la lah ban pynliem noh da 2-1 kol ïa ka Dapboklang Giri SS ha ka semi final kaba la long ha ka sngi Ba-ar ha madan New Nongstoiñ.
Katba ka Kyrshai ka la jop da 7-1 kol ïa ka FGEM Higher Secondary School ha kawei pat ka jingïakhun semi final kaba ar kaba la long ha kane kajuh hi ka sngi.
Nangta, haba phai pat sha ki U-17 ki kynthei, ka Nonglang SS ka la ïoh rung sha ka final, hadien ba ka la pynliem noh da 1-0 kol ïa ka Sib Singh Memorial HSS.
Na ka liang katei ka shlem treikam ka DSO ka la pynbna ba ka jingïalehkai semi final jong ka U-17 ki shynrang kan long mynta ka sngi Balang. Ha ka por 9 baje mynstep ka jingïalehkai kan long hapdeng ka Dapboklang Giri SS pyrshah ïa ka St. Anthony’s SS, Jaidoh, katba ha ka por 1 baje mynsngi ka Sibsingh Memorial Govt. HSS ïa ka Jidon Singh Memorial SS. Kawei pat ka jingïalehkai semi final ha ki U-17 ki kynthei kan long ha ka por 11 baje mynstep hapdeng ka Lurmangkara SS, Risiang pyrshah ïa ka St. Xavier’s Hr SS.
