Imphal, Naitung:
Ki pulit jong ka Manipur ki la kem ïa u wei uba la shah kynnoh ba u dei u dkhot ba treikam jong ka kynhun KCP (MFL) bad lai ngut ki nongdawa pisa kiba don jingïadei bad ka UNLF (Pambei) ha ki jingkhynra ba kyrpang ba la pynlong ha kylleng ka Manipur, ha kaba ki la ïoh ruh ban kurup ïa ka jaka buh tiar ïaleh bad ki kuli ha ka jingkhynra ha Kangpokpi distrik.
Uwei u lehnoh ka KCP (MFL) ïa uba la tip kyrteng kum u Soram Manaoton Meitei ba la tip ruh da ka kyrteng kum u Yening bad kum u Udupa (32) uba shong basah ha Moreh Heinoumakhong Ward No. 7 ha Tengnoupal distrik ha kaba la ïoh jingtip ba u la sah ha Zomi Villa ha North AOC distrik, Imphal, u la shahkem na ka thaiñ Andro jong ka Imphal East distrik ha ka 4 tarik, Naitung. Ki shipai ïada ri ki la ïoh ban kurup ïa ka kali arshaka bad ka Mobile phone na u.
Ha kane ka juh ka sngi ki bor pahara ki la ïoh ban kem ïa lai ngut ki nong dawa pisa kiba la ong ba ki dei ki dkhot ba trei shitom jong ka kynhun UNLF (Pambei) na ka thaiñ Keikhu kaba hap hapoh ka Porompat police station ha Imphal East district. Kine ki briew kiba la shah kem ki dei kiba la tip kyrteng kum u Elangbam Tomba Singh (44) na Bamon Kampu Awang Leikai, uba sah mynta ha Naharup Huirem Leikai; u Patrick Golmei (44) na ka shnong Keikhu Mayai Leikai; bad u Athokpam Borish Singh (34) na ka shnong Naharup Huirem Leikai.
Ha ka jingkhynra ba kyrpang ha ka 5 tarik, Naitung, ki bor pahara ki la ïoh kurup ïa ka jaka buh tiar ïaleh bad ki tiar pyntip na lum Koubru hajan ka shnong Manghol kaba hap hapoh ka Gamnom Sapermeina police station ha Kangpokpi district.
Ki tiar kiba la ïoh kurup ki kynthup ïa kawei ka suloi INSAS kaba 5.56 mm ryngkat bad u magazine, 24 tylli ki suloi SBBL, kawei ka suloi arktang, kawei ka pistol kaba la shna ha la ka ri, ar tylli ki pompital, uwei u bom kawang kti, 35 song ki kuli jong kiba bun ki jingsiat bad ar tylli ki walkie-talkie set.
Ki bor pahara ki la ong ba ka jingwad bad ka jingsynshar ïa ki jaka ka dang ïaid shakhmat ha ki jaka ba don jingma kum shi bynta jong ka jingpyrshang kaba dang ïaid shakhmat ban tehlakam ïa ki kam lehnoh bad ban ïoh kurup ïa ki tiar beaiñ ha kylleng ka jylla.
