Guwahati, Naitung:
U president jong ka All Assam Students’ Union (AASU) u Utpal Sarma u la buh jingkylli halor ka rai ban pynlut T.2.08 klur ban shna ïa ka kamra bam VIP, ka kamra shet bad ka jaka sah jong ki nongtrei ha Gauhati University, da kaba kynthoh ba katei ka jingpynlut ka long kaba eh ban pynshisha haba kane ka skulbah ka ïakynduh jingeh ha ka liang ka pisa tyngka.
Ha ka jingthoh ba la pyllait ha ka rynsan X, u Sarma u la ïathuh ba u la upload ïa ka jingpynbna tender na ka bynta ka projek, da kaba pynpaw ba la dep ban ai tender ïa ka.
Katkum ka tender, kane ka projek ka kynthup ïa ka jingtei ïa ka Guest House VIP Dining Room, Kitchen bad ki Staff Quarters ha ka jinglut kaba antad kan long T.2.08 klur.
U Sarma u la pynshai ba ka AASU kam pyrshah ïa ka jingpynroi ïa ki jingtei ha katei ka skulbah bad u la ong ba un ym don jingpyrshah wat lada pynlut T.10 klur ban tei ïa ki jingtei kiba long ha ka kyrdan pyrthei, tangba kan ym don ka jingduna pisa na ka bynta ki kam pule jong katei ka skulbah.
“Nga ruh nga kwah ïa ka jingpynroi ïa ki jingtei ha ka skulbah Gauhati. Yn ym don jingpyrshah wat lada pynlut T.10 klur ban tei ïa ki jingtei kiba bha tam ha ka pyrthei, tangba kan ym duna pisa na ka bynta ki jingpynlut ha kiwei pat ki kam pule jong ka skulbah,” u la ong.
Hynrei u la khot ïa ka kum ka “ba sngewsih” ba ka skulbah kaba la ïaleh pyrshah ïa ka jingeh ha ka liang ka pisa tyngka ka pynlut da ki klur tyngka ban tei ïa ka kamra bam jong ka Guest House bad ka VIP Dining Hall ha ka jaka ban buh hakhmat eh ïa ki jingdonkam ha ka pule puthi.
U Sarma u la ong ruh ba u la rah ïa kane ka kam sha ka tnad pule puthi jong ka sorkar Assam, da kaba kyntu ba kan wadbniah ïa ka jingpynlut.
