Imphal, Naitung:
Ki bor pahara ki la kem ïa arngut ki lehnoh kiba dei na ki kynhun ba la shah ñeiw beaiñ bad uwei uba la kynnoh ba u dei u nongdawa pisa ha ka por ba la pynlong ïa ki jinpyntreikam ban ïakhun pyrshah ïa ki lehnoh ba la ïatreilang ha kylleng ki lai tylli ki them jong ka jylla Manipur ha ka sngi Ba-ar.
Katkum ka khubor jong ki pulit ka Manipur ba la pynmih ha ka sngi Balang, la ong ba uwei u dkhot jong ka kynhun Revolutionary People’s Front (RPF-PLA) ka kynhun saiñ pyrthei jong ka seng ba la shah ñiew beaiñ ka People’s Liberation Army (PLA) u la shahkem na ka jaka ba u la rieh tngen kaba don ha ka thaiñ Utlou kaba hap hapoh ka jingkhmih jong ki pulit ka Nambol kaba don ha Bistrinupur distrik. Ïa une uba la shahkem la tip kyrteng kum u Keisham Kenedy Singh ba la tip ruh da ka kyrteng kum u Roger (38), u nongshong shnong jong ka Utlou Mamang Keisham Leikai.
Ha kawei pat ka jingkhynra, ki bor pahara ki la ïoh ban kem ïa uwei u dkhot jong ka kynhun ba la shah ñiew beaiñ ka Kangleipak Communist Party-Nongdrenkhomba (KCP-N). Une uba la shah kynnoh u dei uba la tip kyrteng kum u Moirangthem Thoiba Singh (30) na Sugnu Makha Leikai, u la shahkem na ka jaka jong u kaba hap hapoh ka jingpeit jong ki pulit ka Sugnu kaba don ha Kakching distrik.
Ha ka jingkhynra ba kyrpang, ki bor pahara ki la kem ruh ïa uwei uba la shah kynnoh ba u dei u nongdawa pisa ïa uba la tip kyrteng kum u Ningthoujam Roshan Singh (29) na ka ïingsah jong u kaba don ha ka thaiñ kaba hap hapoh ka jingkhmih jong ka Lamsang Police Station ha Imphal West distrik.
Ki pulit ki la ïathuh ba u la ju dawa pisa na ki kali kiba ïaid lyngba katei ka thaiñ.
Katkum ka jingong ki pulit, la kurup ïa ki kot ki sla kiba long beaiñ bad ki tiar pyndonkam ban ïakren na kine kiba la shahkem.
Ïa kine baroh lai ngut la aiti noh sha la ki jong ki jong ki thanat ban pynlong ïa ka jingtohkit kaba bniah bad ban pynngat ïa ki ha ki kyndon aiñ.
