Shillong, Naitung 08
Ka President ka ri ka Droupadi Murmu ka la plie paidbah ïa ki trophy na ka bynta ka Durand Cup 2026, kaba long ka jingsdang jong ka jingpynkhreh na ka bynta kane ka lympung kaba la rim tam ha ka dewbah Asia.
Ïa kane la pynlong ha Rashtrapati Bhavan Cultural Centre ha kaba la don lang ki heh ophisar jong ka tnat shipai bad ki nongpyniaid ïa ka jingïalehkai phutbol.
Haba pynpaw ha katei ka sngi ka President ka la ong ba ha kane ka lympung mynta u snem kin don ki kynhun kiba thymmai ki ban ïakhun na ka bynta ka Durand Cup, ka President’s Cup bad ka Shimla Trophy. Ka la pdiang sngewbha ruh ïa ka jingïashim bynta jong kawei ka kynhun na Sri Lanka, da kaba pynpaw ka jingsngewskhem ba ka jingpynrung ïa ki kynhun thymmai kan nangpynkiewshuh shuh ïa ka jingsngewtynnad bad ka jingïakhun jong kane ka lympung ïalehkai kaba paw.
Ka President ka la ai ka jingkitbok kitrwiang sha baroh ki kynhun ki ban ïashim bynta bad kyntu ïa ki nongïalehkai ba kin bat ïa ka mynsiem ïalehkai katba ki dangnoh synñiang sha ka pateng jong kawei na ki jingïalehkai phutbol. Ka la kdew ba ka phutbol ka don ïa ka jinglah kaba kyrpang ban pynïatylli ïa ki briew bad ka kyntiew ïa ki jinglong kum ka jinglong ryntih, ka jingkut jingmut bad ka jingïatreilang hapoh ka kynhun .
Haba pynpaw ïa ki jingangnud jong ka India ha ka phutbol, ka Murmu ka la ong ba ka ri ka dangdon ka jingïaid lynti kaba jngai ban long ka ri kaba khlaiñ bor ha ka phutbol ha ka pyrthei bad u la kyntu ïa ka jingpyrshang lang ban kyntiew ïa kane ka jingïalehkai hapdengki samla. Ka la pynpaw ka jingkyrmen ba ka Durand Cup kan dangïai bteng ban long kum ka rynsan kaba kongsan ban ithuh bad kyntiew ïa ki nongïalehkai phutbol kiba don jingkyrmen ha kylleng ka ri.
Ka la pynpaw ruh ïa ka jingkmen ba, nalor ka Kolkata, Guwahati, Imphal bad Shillong, ïa kane ka lympung mynta u snem yn pynlong ruh ha ka sien kaba nyngkong eh ha Ranchi.
Ha kane ka sngi la ïadon lang u khlieh duh jong ka Defence Staff u General Anil Chauhan, u khlieh duh jong ka Army Staff u General Dhiraj Seth bad u khieh duh jong ka Naval Staff u Admiral Krishna Swami-nathan nalor kiwei pat.
