Nongstoiñ, Naitung 08
Ka kynhun ïalehkai jong ka Dapboklang Giri Secondary School, Sib Singh Memorial Govt. HSS bad ka Lurmangkara SS, Risiang ki la long sa kiwei pat kiba la lah ban pynthikna ban jam sha ka final jong ka lympung ïalehkai District level Subroto Mukherjee Cup Football Tournament 2026 ba la pynlong da ka shlem treikam jong ka District Sports Officer (DSO) West Khasi Hills.
Ha kane ka lympung kaba la jam sha ka semi final ha ka sngi Balang, ka jingïoh rung ka Dapboklang Giri sha ka final jong ka Under-17 ki khynnah shynrang ka la wan hadien ba ka la lah ban pynliem noh ïa ka St.Anthony’s SS da 5-1 kol.
Shuh shuh, lada phai pat sha ka Sib Singh ka jingïoh rung jong ka sha ka final ha ka Under-17 ki shynrang, ka la wan hadien ba ka la pynliem noh da 3-0 kol ïa ka Jidon Singh Memorial SS.
Haba phai sha ka Under-17 ki kynthei, ka jingïoh jaka ka Lurmangkara SS sha ka final ka la wan hadien ba ka la lah ban pynliem noh ïa ka St. Xavier’s HSS da 1-0 kol bad ïa kane la thep da ka Bansiewdor Puwein ha ka minit kaba 46.
Na ka liang ka shlem treikam jong ka DSO ka la pynbna ba ka jingïalehkai final jong kane ka lympung kan long ha ka sngi Thohdieng (10 tarik) ha madan New Nongstoiñ.
Ka jingïalehkai final ha ka Under-15 ki shynrang kan long ha ka por 9 baje mynstep hapdeng ka Anderson HSS pyrshah ïa ka Kyrshai Government LP&UP, nangta ha ka por 11 baje jingïalehkai final jong ki Under-17 ki kynthei hapdeng ka Nonglang SS pyrshah ïa ka Lurmangkara SS Risiang. Katba, ka jingïalehkai final jong ka Under-17 ki shynrang kan long ha ka por 1 baje mynsngi hapdeng ka Dapboklang Giri SS pyrshah ïa ka Sib Singh Memorial.
