Shillong, Naitung 08
Ka lympung ïalehkai SRGT 3rd Division Football League 2026 ba la pynïaid da ka Shillong Sports Association ka la nangjam shaphrang ha kaba ka Umïew Maw U Sam ka la khur jingjop, hadien ba ka la pynliem noh ïa ka Lummawbah SC da 3-2 kol ha ka sngi Balang.
Ha kane ka jingïakhun kaba la long ha SSA Stadium Polo, ka Umïew Maw U Sam ka la pynkhih jar tang mar ïasdang ka jingïalehkai lyngba u Kularskhem Mawthoh ha ka minit kaba 7. Hynrei shwa ban kut ka kylla step ka Lummawbah ka la pynphai kylla lyngba u Fernando Sohkhlet (40+1).
Hadien san minit ba la bteng ïa ka kylla miet ka Umïew ka la thep biang ïa ka kol kaba ar lyngba u Winjestar Nongbri. Hadien katto katne por ka Lummawbah ka la lah ban pynïakhaid biang lyngba u Edelbert Sun (59) hashwa ba u Bilistar Sun (80+2) un thep kol na ka bynta ban pynlong ïa ka Umïew Maw U Sam ban khur syndon ïa ka jingjop.
Haba phai sha kawei pat ka jingïakhun ha madan MFA hapdeng ka Kharang SC bad ka Mawlynrei SC ki la ïasam mar shi poiñ hadien ba ki la ïakhaid mar 1-1 kol.
Ka Kharang ka la pynkhih jar nyngkong lyngba u Donakor Mynsong ha ka minit kaba 17, hynrei u Shanbok Marboh (37) u la lah ban pynïakhaid kylla na ka bynta ka Mawlynrei SC.
Na ka liang ki bor pynïaid ka SSA ki la pynsangeh noh ïa ka jingïakhun quarter final jong ka U-20 4th Division hapdeng ka Laitlyngkot SC bad ka Seila Sap F&CC na ka daw ka jingdap um ka madan hadien ka jingjur slap. Ïa ka tarik kaba thymmai yn sa pynbna hadien.
Ka jingïalehkai jong ka 3rd Division ha ka sngi Palei kan long hapdeng ka Pomlakrai SC pyrshah ïa ka Lapalang SC ha ka por 1 baje mynsngi bad ka Ïaitylli SC ïa ka Lumparing SC ha ka por 4 baje nohphai sngi. Katba ka jingïalehkai quarter final jong ka U-20 4th Division kan long hapdeng ka Nongkseh United FC pyrshah ïa ka Weilyngkut Area FCC ha ka por 4 baje nohphai sngi ha SSA Stadium.
