Shillong, Naitung 08
Ka Meghalaya Cricket Association (MCA) ka la siew palat T.1.55 klur sha ka kompani pynbiang marbam ha kaba ka jingpynrung GST ka la kut noh, bad ka la leh kumta la palat shi snem hadien ba ki nongkheiñ nongdiah (auditors) ki la pynpaw bunsien hapoh ka account bad ka la paw shai lyngba ki jingbishar bniah na ki kot ki sla ïa ka kheiñ ka diah.
Ïa kane ka jingsiew la ai bor da u Treasurer barim u Dhrubajyoti Thakuria bad u Secretary u Bah Rayonald Kharkamni.
Katkum ki kaiphod ‘audit’ jong ka Deloitte, ka pisa ka la leit sha ka kompeni M/s Ricon Business kaba don ha Assam watla u nongdie u la pynkheiñ ïa ka kyndon jong ka GST naduh u bnai Nailur jong u snem 2023. Ha kaba kut la weng noh ïa ka jingpynrung GST jong ka kompeni ha ka 21 tarik u Jymmang jong u snem 2025.
Hapoh ka riti pynïaid jong ka MCA, kano kano ka jingsiew kaba heh kum kane ka dei ban ïaid lyngba bad wanrah hapoh ka Council shwa ba ki nongsoi jong ka synjuk kin lah ban pyllait ïa ka pisa.
Hynrei ki kot ki sla jong ka jingpeit bniah ki pyni ba u Thakuria bad u Bah Kharkamni ki la ïaid lait ïa ka riti pynïaid bad ki la siew beit ïa ki jingsiew.
Namar katei ka kompani ka la pynkheiñ ïa ki kyndon, ka MCA ka la mad ruh ïa ka jingduhnong kaba ju jia man ka por jong ka jingsiew khajna marbam (input tax credit) ha kylleng ki por ba la pynlong ïa ka kheiñ ka diah.
Ka jingduh noh jong ka ITC ka la poi sha ki katto katne lak tyngka ha ka shisien siew, la kdew katkum ki rekod bala buh. Ym shym la lah ban pynthikna la ka Ricon Business hadien ka la pynthymmai ne em ïa ka jingpynrung kyrteng GST jong ka, bad ïa ka pisa kaba la dep siew ym shym la ïoh biang.
Ka Deloitte ka la ai kyrteng ïa u nongdie ha kylleng ki kaiphod, hynrei ym don ki jingpynbeit lyngba ki jingthoh ba la shim da ka MCA.
Ka BCCI bad ki synjuk kiba la pynïasoh, kynthup ïa ka MCA, ki dei ban pynneh ïa u nongbishar bniah ba napoh (internal auditor) kum shi bynta jong ki kyndon pynïaid hapoh ka synjuk.
