Shillong, Naitung 08
Ka Egyptian Football Federation (EFF) ka la ujor sha ka FIFA ban pyrshah ïa ki rai jong u rephri u Francois Letexier hadien ba ka kynhun jong ki, ka la mad ïa ka jingshah rem da 3-2 ha ka Argentina ha ka pre-quarter final kaba la long ha ka sngi Balang ha Atlanta.
Ka Egypt ka la pynpaw ïa ka jingdiaw mynsiem watla ka la tam da 2-0 kol, hynrei ka Argentina ka la wanphai da ka jingjop bad u Lionel Messi u la ïoh ban thep shi kol watla u la pynlehnohei ïa ka penalty kaba u la ïoh ha ka kylla step. Kane ka nam jop katei ka lahduh jong ki saw snem mynshwa, ka la wan urlong lyngba ka kol kaba khatduh ba la thep da u Enzo Fernandez hashwa ban wai.
Hynrei kane ka jingïalehkai ka la pynlong ïa ka kynhun ïalehkai jong ka Egypt ban bitar namar ba katto katne ki rai ba kongsan jong ki nongpynïaid ïa ki jingïalehkai ki la long pyrshah ïa ka kynhun jong ki, kynthup ïa ka jingbym kheiñ kol hadien ka jingbishar bniah da ka VAR bad ka jingujor penalty kaba ym shym la bishar bniah tang na ka bynta ban ai jingjop ïa ka Argentina.
Katkum ka khubor ba la mih la ong ba u President ka Egypt Football Association, u Hany Abo Rida, u la phah da ka jingujor sha ka FIFA, pyrshah ïa u rephri ka ri France, u Francois Letexier bad baroh kiba don bynta ban pynïaid.
Katei ka kaiphod ka la ong ba katei ka jingujor ka la kyrpad ban tohkit bniah ïa kaei kaba ka Egypt ka la pynpaw halor ka jingshim ïa ki rai kiba kongsan. Ka synjuk ka la kyrpad ruh da kaba shai ba dei ban weng noh ïa ka kynhun pynïaid jong ka France na ka bynta ki jingïalehkai ba dangsah namar kaei kaba ka shim ba ka dei ka jingbakla kaba jur.
Hashwa ïa kane, u coach ka Egypt u Hasan ruh u la pynpaw ka jingsngewsih ïa ki katto katne ki rai. U la ai jingmut ruh ba ka jingjia ka la ktah jur ïa ka jingïalehkai, wat ban pynpaw ba ka don ka jingkwah ïa u Messi bad ka Argentina ba kan dangïai sah ha kane ka lympung.
“Ngi la long kham bha ha baroh ki liang ban ïa ka lahduh, hynrei la shah ktah ha ki jingjia kiba hapoh ha madan bad kiba na shabar jong ka,” la ong u Hassan. “Lehse ki kwah ban pynneh ïa katei ka lahduh bad u Messi haduh kaba kut kane ka lympung,” u la pynpaw ha ki lad pathai khubor hadien ba la kut ka jingïalehkai.
“Ha ka phutbol, ki don kiei kiei kiba wan jia ban shah tuklar ha kiba na shabar kiba long pyrshah ïa ki jingbishar bniang na ki kor ki bor,” u la bynrap.
