Shillong, Naitung 09
Ka Weilyngkut Area FCC ka la jam sha ka semi final ha ka lympung ïalehkai SSA U-20 4th Division Football League 2026, hadien ba ka la pynliem noh ïa ka Nongkseh United FC lyngba ka tie-breaker da 4-2 kol ha ka sngi Palei.
Ha kane ka jingïakhun quarter final kaba la long ha SSA Stadium Polo, baroh ar ki kynhun ki la long kiba ïaryngkat bor ha ka rukom ïalehkai ha kaba ki la ïakhaid mar 1-1 kol haduh kaba kut ka jingïalehkai. Ka Weilyngkut ka la pynkhih jar nyngkong eh lyngba u Banskhem Kharkrang ha ka minit kaba 43, hynrei ka Nongkseh United ka la pynïakhaid kylla lyngba u Samphrangshai Rani (55).
Te kumta ha ka jingïashut tie-breaker, ka Weilyngkut Area ka la lah ban khur syndon ïa ka jingjop ha kaba ka la tam da 4-2 kol na ka bynta ban jam sha kawei pat ka wat jingïakhun.
Ka jingïakhun quarter final mynta ka sngi Thohdieng kan long hapdeng ka Laitlyngkot SC pyrshah ïa ka Seila Sap FCC ha ka por 4 baje nohphai sngi.
