Shillong, Naitung 09
Shi bynta ban rakhe ïa ka World Environment Day, ka Meghalaya Veteran Table Tennis Association (MVTTA) ka la pynlong ïa ka lympung ïalehkai 8th All Meghalaya Masters TT Team Championships ha ka sngi Saitjaiñ ha Indoor Stadium kaba ha JNSC, Polo.
Ha kane ka lympung la wan shim bynta da ki kynhun ki nongïalehkai Table Tennis kiba la rim, kiba la wan na kylleng ka Jylla. Te kumta ki la don haduh phra tylli ki kynhun kiba kynthup ïa ka Go Green, Stay Fit, Save Fuel, Swachh Bharat, Save Trees, Save Water, Save Earth bad ka Protect Nature.
Ïa ka nam lahduh la rah da ka kynhun jong ka Save Trees ba la lamkhmat da u Bruce Marak. Kane ka kynhun jong u ka kynthup ïa u Ratan Biswakarma uba la jop ïa u Bah Eros Kharshiing jong ka Save Earth da 3-0 ha ka jingïakhun phainal na ka bynta ban ïohpdiang ïa ka trophy nam lahduh jong u snem 2026.
Kiwei pat ki nongïalehkai ki long u Suraj Joshi, Kiran Thapa & Anand Kausal. Ïa ka kynhun jong ka Save Earth la lamkhmat da u Bah Lamphrang L Nonglait bad ki paralok ba ïalehkai lang ki long u Arup Nag (na Tura), Bah J Warbah, BR Dasgupta bad u Bah Eros Kharshiing.
U Arup Nag na Tura u la long u khlur ïalehkai ha kane ka lympung ha kaba u la khur jingjop ha ka baroh ki jingïakhun jong u. Te kumta u la ïohpdiang ïa ka nam Player of the Tournament. Ka kynhun Save Trees ka la lah ban pynliem noh ïa ka kynhun jong ka Save Earth da 3-2 ha ka jingïakhun phainal.
La sam khusnam kyrpang ïa u Taraman Gurung u rangïalehkai ba paw jong ki snem ba la leit namar ka jingnoh synñiang kaba long ka nuksa jong u ha ka kam ïalehkai bad khamtam ha ka jingïalehkai Table Tennis.
Ïa ki khusnam la sam da u Myntri Sorkar bad uba long u MLA ka Pynthorumkhrah u Bah A.L Hek kum u kongsan ha ryngkat ka jingïadon lang ki dkhot ka MVTTA bad kiwei kiwei.
