Shillong, Naitung 09
Ka lympung ïalehkai SRGT 3rd Division Football League 2026 ba la pynïaid da ka Shillong Sports Association (SSA) ka la nangjam shaphrang, ha kaba ka Pomlakrai SC bad ka Lumparing SC ki la khur jingjop ha ka sngi Palei.
Ha ka jingïakhun kaba nyngkong kaba la long ha SSA Stadium Polo, ka Pomlakrai ka la pynliem noh ïa ka Lapalang SC da 1-0 kol bad kane ka la wan urlong lyngba u Pynkhrehkloi Marbaniang, uba la thep ha ka minit kaba 54.
Ha kawei pat ka jingïakhun kaba la long ha madan MFA, ka Lumparing ka la jop da 6-1 kol ïa ka Ïaitylli SC.
Ha kane ka jingïakhun, ki rangïalehkai ka Lumparing ki la lah ban pynpaw ïa ka jingtbit naduh kaba sdang ha kaba u Nathaniel Kharkongor u la thep ar kol ha ka minit kaba 4 & 8. Kumjuh ïa kiwei pat ki ar kol la thep sa u Joslang Lyngkhoi (5 & 14).
Ka Lumparing ka la ïoh biang ban thep sa ar kol lyngba u Riskhem Syiem ha ka minit kaba 33 bad kawei pat da u Pynbianglang Nongkhlaw (65). Hashwa ban wai artad ka Ïaitylli ka la lah ban pynphai kylla shi kol lyngba u Melawantei Kharlukhi (80+2) hashwa ba kan mad ïa ka jingshah rem.
Ha ka sngi Thohdieng ka jingïalehkai kan long hapdeng ka Rynjah pyrshah ïa ka Nongumlong SC ha ka por 1 baje mynsngi.
