Shillong, Naitung 09
Ka Nagaland ka la long ka lahduh, katba ka Meghalaya ka la wan ha ka kyrdan ba-ar ha ka lympung ïalehkai 14th Senior National Pencak Silat Championship 2026, kaba la poi noh sha kaba kut ha ka sngi Balang.
Ka jingïoh ka Nagaland ïa katei ka nam lahduh, ka la wan hadien ba ka la lah ban khur 6 tylli ki takma ksiar, 2 tylli ki takma rupa bd kawei ka takma rnong. Katba Meghalaya ka la khur 4 tylli ki takma ksiar, 2 tylli ki takma rupa bad 6 tylli ki takma rnong.
Ïa ka kyrdan balai la ïoh da ka All India Police Sports Control Board, kaba la ïoh ban khur 4 tylli ki takma ksiar, 2 tylli ki takma rupa bad kawei ka takma rnong.
Haba phai sha ka kynhun ïalehkai ka Meghalaya, ka nam ba-ar kan kylla long kum uwei na ki mawmer uba ka la lah ba kan kam ha kane kawei pat ka jait jingïalehkai, kaba wan hadien ba ïa ka synjuk ïalehkai jong ka Meghalaya Pencak Silat Asso-ciation (MPSA), kaba dang shu sdang ban seng mynta shi snem, bad dang ha u Lber mynta ka snem, hynrei kane ka kynhun ïalehkai ka jylla ka la lah ba kan rah ïa ka nam kum ka lahduh ne Overall Champions Senior Natio-nal Khelo India ASMITA Pencak Silat League 2025-26 kaba dei na ka bynta ki samla kynthei.
Ha kane ka kynti ïa kane ka lympung ïalehkai balai sngi la pynlong ha Multipurpose Indoor Hall jong ka SAI Training Centre, Shillong ha kaba la wan shim bynta da kumba 1,500 ngut ki nongïalehkai na ki 36 tylli ki jylla ban ïakhun ïa ka kyrdan ïalehkai jong ka artistic (seni) bad combat (tanding).
Ïa kane jingïakob la pynlong da ka Indian Pencak Silat Federation (IPSF) ryngkat bad ka Meghalaya Pencak Silat Association bad da ka jinglah ban pynlong ïa kum kane ka lympung lehse ka la plie lad ba kan long kawei na ki jingïalehkai ha ka 39th National Games ka ban long ha u snem ban wan ha kane ka Jylla.
U kongsan uba la wan ban don lang shipor ha ka sngi pynkut u dei u MLA ka Nongpoh u Bah Mayralborn Syiem bad uba bat kum u Chairman ka Meghalaya State Health Advisory Board,
Na ka liang ka Meghalaya, ki nongïalehkai kiba la khur ïa ki takma ksiar ki long u Banrilang Muktieh (tanding -65kg female), Tobias Klein (seni ganda male), Philip Khymdeit (seni ganda male) bad Rimchi Sangma (seni tunggal female).
Katba ki nongïalehkai ba la khur ïa ki takma rupa ki long ka Viviana Mallai (-70kg female) bad Tapash Rabha (-85kg male), bad kiba la khur ïa ki takma rnong ki long ka Khamtimon Rympei (-80kg female), Domonika Syiem (-60kg female), Ïohdahun Klein (-55kg female), Anthony Shadap (-55kg male), Sundayrius Khym-deit (-60kg male) bad u Moon Moon Rabha (-70kg male).
Ïa ka kynhun ïalehkai ka Jylla la ïalam kum u coach da u Bah Thomas Rangthaluh, katba u Manager ka kynhun u dei u Balamlang Khriam.
