Guwahati, Naitung:
Ka sorkar Assam ha ka 9 tarik, Naitung, ka la pyntip sha ka ïingdorbar ka jylla, ba ki don 22 tylli ki skul primary ha Binnakandi Assembly konstitwensi, kiba pyntreikam mynta tang da uwei u nonghikai, wat haba ka jylla, ka don baroh 39,531 tylli ki skul primary, katkum ka jingkheiñ jong ka UDISE 2025-26.
Haba jubab ïa ka jingkylli kaba la buh da u MLA u Badruddin Ajmal, u Myntri ka School Education u Ranoj Pegu u la ong ba ka Assam ka don haduh 33,232 tylli ki skul Lower Primary (LP) bad 6,299 tylli ki skul Upper Primary (UP).
Ha Hojai distrik ki don 891 tylli ki skul primary, kiba kynthup ïa 745 tylli ki LP School bad 146 tylli ki UP School.
U Myntri u la pyntip sha ka ïingdorbar ba ka Binnakandi konstitwensi ka don haduh 322 tylli ki skul primary, kiba kynthup ïa 276 tylli ki Lower Primary bad 46 tylli ki Upper Primary, ha kaba 22 tylli ki treikam mynta tang uwei u nonghikai.
Ïa ka thup jong kine ki skul bad ki nonghikai ba la buh hangta la pyndait kum ka jingpynrung ha ka jubab jong ka Assembly.
Haba kren shaphang ki jingeh halor ka jingaiti ha ki kam elekshon ïa ki nonghikai bad kiwei kiwei ki kam ba kongsan, u Pegu u la pynshai ba ïa ka skul la kheiñ kyllum kum ka skul ba don tang uwei u nonghikai haba kawei na ki ar tylli ki kam hikai ba la mynjur jong ka ka dang sah thylli.
Hynrei ki bor pynïaid ïa ka pule puthi ha ka thaiñ ki ju pynbeit shipor da kaba phah da uwei pat u nonghikai lane u Cluster Resource Centre Coordinator (CRCC) ban kyrshan ïa kum kine ki skul.
U la pynpaw shuh shuh ba ha ki khep ba kyrpang ha kaba ka skul ka treikam da ka met tang bad uwei u nonghikai, ki bor synshar distrik ki kiar na kaba aiti ïa kata ka jingjied nonghikai ne kiwei kiwei ki kam paidbah kiba kyrkieh, katba lah, ban pynthikna ba ka jinghikai ha ki kamra klas kan ym shah pynthut.
U Myntri u la batai ruh ïa ka polisi pyntreikam ïa ki nonghikai jong ka sorkar, da kaba ong ba ïa ki nonghikai la thung katkum ki jingdonkam ha ka pule puthi bad ka jingpynïasoh lang ïa ki sobjek.
Ha ka kyrdan Lower Primary, ki nonghikai ki pynïaid ïa ka jinghikai ba bun kyrdan naduh ki Klas I haduh V, da ka rukom ba arngut ki nonghikai ha kawei ka skul LP katba ki dang pynneh ïa ka jingkheiñ ïa ki khynnah skul bad ki nonghikai kaba 30:1, katkum ka jingdon ki khynnah skul kiba pynrung kyrteng.
