Shillong, Naitung 10
Ka England ka dang ïakhun ïa ki jingeh kiba khraw ha ka kynhun ïalehkai shwa ban ïakhun pyrshah ïa ka Norway ha ka World Cup mynta ka sngi Saitjaiñ ha Miami ha kaba u Marc Guehi u ‘ranglehkai shadien ba radbah u don ka jingmynsaw khyndiat ha ka bynta ki dohksah ka kjat na ka jingïalehkai ba la jop da 3-2 ïa ka Mexico. Lada um lah ban pyndep ka jingkilan met, u lah ban duh ïa ka jingïalehkai.
Katba u Declan Rice u ‘rangïalehkai pdeng madan ba kongsan u la pep ar sngi ïa ka jingkilanmet namar ka jingpang bad u dang ïakhun pyrshah ïa ka por ban koit.
U Jarell Quansah udei u ‘rangïalehkai dien u la shah khang ar tylli ki jingïalehkai hadien ba u la ïoh ïa ka red card pyrshah ïa ka Mexico, kaba pynlong ïa u manager u Thomas Tuchel ban duna ki lad ki lynti ban ïakhun pyrshah ïa u rangïalehkai ba pawkhmat jong ka Norway, u Erling Haaland.
U Jordan Henderson u ‘rangïalehkai pdeng u la shah sumar bha ha ka kti kaba u la mynsaw ha ka por lehkmen hadien ka jingïalehkai. U la wanphai biang sha ka jaka sah ka kynhun ban pynkoit ïa ka met hynrei un nym ïalehkai shuh.
Katba ka khubor kaba bha na bynta ka kynhun ka long ba u Reece James hadien ba u la mynsaw ha ki dohksah ki kjat jong u ha ka jingïakhun ha ka Group Stage, une u rangïalehkai ba shadien u la wanphai biang sha ka jingkilan met ha ka sngi Palei, kaba la ai jingkyrshan kaba khraw ïa ka kynhun ïalehkai.
Ka kynhun kaba jop ha kane ka jingïalehkai ha ka sngi saitjaiñ kan rung sha ka semi final ban ïakhun pyrshah ïa ka Argentina lane ka Switzerland.
