Itanagar, Naitung:
U Myntri Rangbah ka Arunachal Pradesh u Pema Khandu ha ka 9 tarik, Naitung, u la pynpaw ïa ka jingïadei kaba skhem hapdeng ki shipai India bad ki jaitbynriew ha khappud, da kaba ong ba ka jingïadei ka dang long ka mawjam kaba kongsan ha kaba ïada ïa ki khappud jong ka ri.
Ha ka jingthoh kaba u la buh ha ka rynsan X, u Khandu u la ong ba ka tnat shipai Indian Army dang shen ka la wanrah ïa ka jingpynkhlaiñ ha kaba ïadei bad ki jingpyntreikam ha ki shnong kiba don ha ka bynta khappud jong ka Thingbu bad Mago da kaba ïakren bad ki Gaon Burahs, ki nongshong shnong ka thaiñ bad ki nongsharai masi.
U la ong ba ka prokram ban leit shabar ka pynshlur ruh ïa ki samla ban bud ïa ka jingpule katba ka pynskhem ïa ki jinglong jong ka jingshakri, ka jingïeid ri bad ka jingtei ïa ka jaitbynriew hapdeng ki jaitbynriew khappud.
U Khandu u la kynthoh ba ym don kaei kaei kaba kham khlaiñ bor ban ïa ka jingïadei kaba neh hapdeng ki shipai India bad ki briew kiba sah ha ki khappud jong ka ri, da kaba bynrap ba kum kine ki jingïatreilang ki don ka bynta kaba kongsan ban pynlong ïa ki khappud jong ka India kiba shngaiñ.
U Myntri Rangbah ka Jylla u la ïaroh ruh ïa u Lieutenant General Neeraj Shukla, Corps Commander jong ka Gajraj Corps, uba la ïalam ïa kane ka sienjam ba dei ban ïaroh kaba thmu ban pynkhlaiñ ïa ka jingïadei bad ki nongshong shnong ha khappud.
