Shillong, Naitung 12
Ka lahduh jong ki saw snem ba la lah, ka Argen-tina, kan ïakynduh pyrshah ïa ka England ha ka semi final jong ka FIFA World Cup 2026, hadien ba ka la lah ban pynliem noh ïa ka kynhun ki 10 ngut ki rangïalehkai ka Switzerland, da 3-1 kol hadien ba la pynjlan ïa ka por ïalehkai sha ka ‘extra time’.
Ha kane ka jingïakhun quarter final u Alexis Mac Allister u la pynkhih jar nyngkong eh ha ka minit kaba 10 hadien ka jing-ïarap pynbuh da u Lionel Messi bad ban pynlong ï aka Argentina ban tam shi kol ha Kansas City Stadium ha ka step jong ka sngi U Blei.
Ha kane ka jingïakhun katei ka kynhun ba khlaiñ bor na South America kam shym la lah shuh ban thep kol, hynrei dei ha ka minit kaba 67 jong ka kylla miet ba ka Switzerland ka la lah ban pynïakhaid kylla lyngba u Dan Ndoye.
Kane ka kynhun kaba na Europe ka la hap ban ïalehkai noh sa tang shi-phew ngut ki rangïalehkai hadien ba u Breel Embolo u la ïoh biang sa ka yellow card kaba ar ha ka minit kaba 72. Kane ka la wan lyngba ka jingbishar bniah lyngba ka VAR, la weng noh ïa ka yellow card jong u rangïalehkai ka Argentina u Leandro Paredes bad kane ka la treikam lyngba ka kyndon aiñ kaba thymmai jong ka VAR ha kane ka lympung.
Katei ka jingshah sei card u Embolo ka dei na ka daw ba u la kyllon hi ha madan khnang ban ïoh ïa ka free kick bad na ka liang u rephri na Portugal u Joao Pinheiro u la kylla biang ïa ka rai bad la pynngat ïa u Embolo.
Wat hapdeng ka jingshah weng noh uwei u rangïalehkai, hynrei ka Argentina kam shym la lah ban thep kol haduh kaba kut ki 90 minit. Dei hadien ba la pynjlan ïa ka ‘extra time’ ba katei ka kynhun ka la ïoh ban thep biang sa ar kol lyngba u Julian Alvarez (112) bad u Lautaro Martinez (120+1) na ka bynta ban khur syndon ïa ka jingjop.
Ha kawei pat ka jingïakhun kaba la long kham hashwa, ka England ka la pynliem noh ïa ka Norway da 2-1 kol bad kane ka la wan urlong lyngba ki ar kol ba la thep da u Jude Bellingham.
Ka jingjop ka England ka la pynkut noh ïa ka jingïaid lynti u Erling Haaland ha ka World Cup, uba la khmih lynti ban pynurlong ïa ka Norway ba kan dangbteng jingjop ha kane ka lympung.
Watla ka jingïakhun ka la long kaba ïakhaid bha, hynrei hadien shiteng kynta ka Norway ka la pynkhih jar nyngkong eh lyngba u Andreas Schjel-derup ha ka minit kaba 36. Hashwa ban kut ka jingïalehkai jong ka kylla step ba u Bellingham (45+2) u la lah ban pynïakhaid kylla na ka bynta ka England. Une u khlur ïalehkai u la thep biang sa shi kol ha ka extra time ha ka minit kaba 93 na ka bynta ban khur syndon ïa ka jingjop.
Te kumta ka Argentina kan ïakynduh pyrshah ïa ka England ha ka semi final ka ban long ha ka step jong ka sngi Palei (16 tarik) ha Atlanta, katba ka Spain ïa ka France ha ka 15 tarik.
