Shillong, Naitung 12
Ka Shillong Lajong FC kan ïakynduh nyngkong pyrshah ïa ka lahduh jong ka Meghalaya State League 2026, ka Nong-kseh S&CC ha ka lympung ïalehkai 135th Durand Cup ban pynïaid da ka kynhun shipai jong 101.
Kane ka jingïakhun kan long ha ka 31 tarik mynta u bnai ha Jawa-harlal Nehru Stadium kaba ha Polo ha ka por 5 baje janmiet.
Kine ki kynhun ki la don ha ka Group-E kaba kynthup lang ruh ïa ka Langsning FC kaba la wan ba-ar ha ka MSL 2026 lem bad kawei pat ka kynhun nabar jylla ka Mumbai FC.
Kat kum ka jingpyllait ïa ka prokram jong kane ka lympung, la ong ba ka Langsning kan iakynduh pyrshah ia ka Mumbai ha ka 3 tarik u Nailar, katba ka Nongkseh kan iakynduh pyrshah ia ka Langsning ha ka 6 tarik. Ka Lajong kan iakynduh pyrshah ia ka Langsning ha ka jingailehkai kaba khatduh ka ban long ha ka 13 tarik u Nailar.
Ïa kane ka lympung ïalehkai kaba la rim tam ha ka dewbah Asia, yn sdang naduh 25 tarik mynta u bnai bad yn pynkut ha ka 23 tarik u Nailar mynta u snem. Kin don haduh 24 tylli ki kynhun ki ban shim bynta ha la ki jong ki zone kiba kynthup ïa ka Kolkata, Shillong, Imphal, Guwahati bad ka Ranchi zone, kaba la ïoh ban pynlong ha ka sien kaba nyngkong eh ïa kane ka lympung . Ha katei ka sngi sdang ïa kane ka lympung ka ban long ha Kolkata, yn ïakhun hapdeng ki ar tylli ki kynhun kiba khlaiñ born a West Bengal kata ka Mohun Bagan bad ka Bengal.
Kitei ki 24 tylli ki kynhun, ki kynthup ïa ki klob kiba na ka Indian Super League (ISL), Indian Football League, na ki kynhun shipai bad kawei na Sri Lanka ka Defenders FC.
Kumba ka paw ka Shillong Lajong ka dei ka kynhun kaba la rung semi final ha u snem ba la lah, hashwa ba kan shah rem noh ha ka NorthEast United FC, kaba la rah ïa ka nam lahduh.
