Guwahati, Naitung:
Ki la jan don kumba 18,000 ngut ki samla pule ki ban ïoh ïa ki scooter mynta u snem shwa ban weng noh ïa ka pisa na ka skhim ai khusnam kan pynïar ïa kiwei pat ki jingthmu ban pynbha ïa ki khynnah pule, ka skhim Nijut Moina bad Nijut Babu la thmu ban sdang biang ha u bnai Nailar.
Ka sorkar Assam ka la pynbna ba kan sangeh noh ïa ka jingsam ïa ki scooter sha ki khynnah pule ba la leh bha hapoh ka skhim Dr Banikanta Kakati Meritorious Award naduh ka Academic Session ban wan.
Haba wanrah ïa ka mang tyngka jong ka jylla 2026-27 ha ka 10 tarik, Naitung, u Myntri ka tnat pla tyngka u Jayanta Malla Baruah u la ong ba jan 18 hajar ngut ki khynnah pule kin ïoh ïa ki scooter mynta u snem, hadien kata yn sa weng noh ïa kane ka skhim.
Ïa ka pisa ha ka jaka kata yn pyndonkam biang sha ka jingpynroi ïa kiwei pat ki jingthmu na ka bynta ka jingbha jong ki khynnah pule.
Ka sorkar ka la pynbna ruh ba ka skhim Nijut Moina bad Nijut Babu kan sdang biang naduh u bnai Nailar.
Haduh mynta, palat 5.44 lak ngut ki khynnah pule kynthei ki la ïoh jingmyntoi na ki prokram, ha kaba la dep ban pynlut T.374 klur tyngka. La khmih lynti ba kumba 5.30 lak ngut ki khynnah pule kin ïoh jingïarap pisa ha une u snem mang tyngka ba mynta.
Nalor kiwei kiwei ki lad jingïarap, ka sorkar kan pynphai biang ïa ka jingiarap pisa kaba T.1,500 man la u bnai na ka bynta ki 621 tylli ki Udasin Bhakat kiba ïadei bad ki satras.
Ka jingkyrshan ïa ki nongrep kiba rit bad kiba rit paid hapoh ka Mukhyamantri Krishi Sa-Sajuli Yojana ruh kan dang ïai bteng, da kaba ai pisa T.11,000 shisnem sha ki nongïoh jingmyntoi kiba dei hok.
Ka sorkar ka la ong ba ka rai ban pynsangeh noh ïa ka skhim scooter ka long ban pynthikna ïa ka jingkyrshan pule kaba kham jylliew bad kaba ïahap ïa ki khynnah pule ha kylleng ka Assam.
