Aizawl, Naitung:
Ki la don palat 80 tylli ki longïing kiba la shah pynkynriah sha ki jaka ba kham shngaiñ ha Mizoram hadien ba ka wah Khawthlangtuipui ka la tuid lut ha ka distrik Lunglei hadien ba la jan shi taïew jong ka jingjur slap kaba khlem sangeh, la ïathuh ki heh sorkar. Kane ka jingshlei um, ka la ktah jur ïa ka sor Tlabung, kaba don hajan khappud jong ka Bangladesh, ha kaba 42 tylli ki longïing, ki la shah pynkynriah, hadien ba ki ïing jong ki, ki la shah rong lut ne shi bynta, namar ka jingkiew jong ka um. Sa shiphew tylli ki longïing na ka shnong Tipperaghat kaba hap hapoh ka Tlabung subdivision ruh ki la shah pynkynriah noh namar ba ka umsaw ka la tap lut ïa katei ka thaiñ. Nalor ka jingshlei um, ki bor pynïaid ki la pyntip ïa ka jingtwa khyndew, ka jinghap maw bad kiwei kiwei ki jingjia kiba ïadei bad u slap ha palat 29 tylli ki jaka ha kylleng ka jylla. Haduh mynta ym pat don kano kano ka jingjia ba sngewsih. Ka jingther slap kaba bteng ka la pynthut ruh ïa ka jingpynïasoh ïa ki surok. Ka surok National Highway-54 ka dang shah khang lynti haduh mynta hadien ka jingtwa khyndew kaba jur bha hajan ka shnong Bualte ha Lunglei distrik, kaba la pynlong ïa ki katto katne ngut ki nongwan jngohkai pyrthei ban sahkut ha kine ki saw sngi ba la dep bad pyndkut noh ïa ki surok ban poi sha ki distrik ba shaphang Shathie jong ka Lawngtlai bad Siaha na kiwei pat ki bynta jong ka Mizoram. Ka surokbah AizawlThenzawl-Lunglei ruh ka la kylla long kaba ym lah shuh ban ïaid na ka daw jong ka jinghap maw kaba jur bad ka jingtwa khyndew ha Ngaizel, kaba don sha ki bynta ba shaphang Shathie jong ka Aizawl. U Myntri ka State Disaster Management and Rehabilitation u Lalnilawma, u la leit ban jngoh ïa ka thaiñ Ngazel kaba la shah ktah ha ka jingtwa khyndew ha ki khyndiat sngi jong ka taïew ba la lah bad kyntu ïa ki nongshong shnong ba ki dei ban long kiba husiar bha namar ba u slap u dang ïai bteng ban wanrah ïa ki jingjia ba sngewsih ha kylleng ka jylla Mizoram. U Myntri u la pynthikna ba yn ai jingïarap pisa bad jingïarap kaba kham kloi bad kaba shai sha ki longïing kiba shah ktah katkum ki kyndon jong ka sorkar.
