Shillong, Naitung 13:
Ka prokram ai jinghikai jong ka Dream Elite PreSeason Summer Basketball Camp 2026 ba la pynlong da ka DREAM ha ryngkat ka jingïatreilang bad ka Dubakh Sports Pvt. Ltd, kaba la kyrshan lang da ka tnat Social Welfare jong ka Sorkar Jylla ka la poi sha kaba kut noh ha ka sngi Saitjaiñ ha Pearly Dew School, Jaïaw, Shillong. Wat hapdeng ka jingpynthud u slap ha katei ka sngi, hynrei ïa kane ka prokram kaba khatduh la lah ban pynïaid beit, kaba la pyni ïa ka jinglah ban pynurlong, ka jingkut jingmut, bad ka jingkmen jong ki samla kiba ïashim, ki coach, bad ki nongpynïaid. Ha kane ka sngi kaba khatduh la lah ban pynlong haduh san tylli ki kyrdan ïalehkai phainal kata ka Special Batch Final, Girls Intermediate Final, Boys Intermediate Final, Girls Advanced Finals bad ka Boys Advanced Final. Ha kane ka prokram la ïadonlang u heh pulit ba la shongthait u Bah Francis Kharshiing bad Director jong ka DREAM, ka Kong Barihunlang Wankhar, Headmistress jong ka Emjay Secondary School, Dr. Tosanlang Kharsati, Principal ka Pearly Dew Higher Secondary School. Haba ai jingkren ha katei ka sngi, u Bah Francis u la pynshlur bad ai mynsiem ïa ki samla ïalehkai ba kin don ïa ka jingangnud ha ka jingim ka jong ki, ban long kiba don akor, bad ban ïashim bynta ha ki kam ïalehkai kum ka lynti sha ka lawei kaba koit ba khiah bad kaba don jingmut. U la pynskhem biang ruh ïa ka jingangnud jong ka DREAM ban kyntiew ïa ka jingpynkupbor ïa ki samla bad ka jingïalap pynphriang na ka bynta ka Jylla kaba lait na u drok. Nangta la pynbyrngia ïa ki nongpeitkai da ka jingpynsngewthuh paidbah kaba don jingmut, bud ka jingrwai kaba kyrpang kaba la pyni da ka kynhun DREAM. Ha katei ka ‘Dream Elite Pre-Season Summer Basketball Camp 2026’ ki la don palat 100 ngut ki nongïalehkai basketball na kylleng ka nongbah bad ki jaka ba marjan kiba la wan shim bynta. Nalor ka jinghikai basketball, kane ka prokram ka pynleit jingmut ha ka ban kyntiew ha ka akor ka burom, ka jinglong nongïalam, ka jingïatreilang, ka rukom im kaba koit ba khiah, bad ka jingpynsngewthuh ban pyllait na ka jingdih buaid.
