Shillong, Naitung 13:
Katba ka lympung FIFA World Cup 2026 ka dang bteng ha kylleng ka ri America, ki jingai khusnam pisa na ka bynta ki riew pawkhmat jong ka phutbol ki la poi sha ka kyrdan kaba khraw tam. Hadien ba la pynkut ïa ka kyrdan jong ka quarter final kaba heh bha, ki saw tylli ki ri kiba rem noh ha ki jingïakhun jong ki, ka Morocco, Belgium, Norway bad Switzerland ki hap leit phai noh sha la ïing hynrei ryngkat ka khusnam kaba heh bha kaba long mar $19 million dollars ki la ïoh. Ka FIFA ka la wanrah ïa ka khusnam kaba khlem pat ju don mynno mynno ruh kaba long $871 million na ka bynta ka jingïalehkai ba la pynheh kaba don 48 tylli ki kynhun, kaba pyni ïa ka jingkiew kaba 50% na ka jingïalehkai ha u snem 2022 ha Qatar. Hapoh kane ka rukom siew bai lutksan kaba thymmai kaba pynshong nongrim ha ka jingtreikam, man la ka sienjam shakhmat ha ki jingïalehkai knockout ka ai ïa ka jingkyrshan kaba khraw ha ka liang ka pisa tyngka, ha ka ba ki lahduh kin khur $50 million, ka ba wan ba-ar kan ïoh $33 million, kaba lai $29 million, kyrdan ba saw $27 million bad ki ba poi haduh Quarter final (5th8th) mar $19 million. Katba ka jingïohi ïa ki nongïalehkai ba pawnam kum u Achraf Hakimi, u Erling Haaland, u Kevin De Bruyne, bad u Yann Sommer ka pynpaw ïa ka jingsngewsih ban duh ïa ka jingïalehkai semi final, hynrei ka jingsiew kaba $19 million ka la long ka jingmyntoi na ka bynta ki seng jong ki. Kumban shu pynkynmaw ka Morocco ka la shah pynliem noh ha ka France ha ka jingïalehkai kaba itynnad bha, katba ka Belgium ka la mad jingrem noh ha ka jingïakhun pyrshah ïa ka Spain ha Los Angeles. Ka Norway pat ka la rem noh ha ka England bad ka Switzerland ka la liem noh ha ka Argentina. Na ka bynta kine ki senglehkai football jong ki ri, ka khusnam kaba $19 million ka long kaba kham palat ban ïa kaba shu ai khusnam ha ka jingïalehkai. Ka FIFA bad ki bor pynïaid phutbol ha ka thaiñ ki thmu ban pynrung biang ïa kine ki jingkamai beit-beit ha ka phutbol naduh ka kyrdan kaba rit, ki jaka ai jinghikai kiba thymmai, ka jingpynroi ïa ki jaka ai jinghikai ïa ki samla, bad ki jingpynkhreh na ka bynta ki jingïalehkai ba heh ha ka pyrthei ha ki por ban wan. Katba ka jingangnud ban rah ïa ka khusnam bad ka trophy ksiar kaba pawnam kan dang sah tang na ka bynta saw tylli ki kynhun, hynrei kine ki ri ki iehnoh ïa ka rynsan kaba khraw tam ha ki jingïalehkai kiba la burom ha madan bad kiba la ïoh jingithuh shibun na ka.
