Itanagar, Naitung:
Uwei u dkhot jong ka kynhun NSCN-K (Angmai) kaba la shah ñiew beaiñ u la leit pyndem noh hakhmat ki pulit bad ki bor pahara ha Longding distrik jong ka Arunachal Pradesh, la ïathuh ki heh sorkar ha ka 12 tarik, Naitung. Une u lehnoh uba la pyndem ïalade u dei uba la tip kyrteng kum u Pongngoi Wangnowham (37) uba dei u nongshong shnong jong ka shnong Kamkah, u la leit ban aiti ïa ki tiar siat ha ka ophis treikam jong u Superintendent of Police ha Longding ha ka sngi Saitjaiñ. Kane ka jingleit pyndem wait ka la long ha ka jingïadonlang ki heh pulit ka Arunachal Pradesh, ki shipai 24th Assam Rifles, bad ki shipai Intelligence Unit. U heh pulit jong ka Longding, u Dekio Gumja, u la ong ba la ïathuh ba u Wangnowham u don jingïadei bad katei ka kynhun lehnoh ba la shah ñiew beaiñ naduh u snem 2005. Ki heh sorkar ki la ong ba katei ka jingaiti noh ka long shi bynta jong ki jingpyrshang ba dang ïaid shakhmat jong ki bor pahara ban pynshlur ïa ki lehnoh ban phai biang sha ka lynti kaba bha bad ban pynskhem ïa ka jingsuk jingsaiñ ha ka thaiñ.
