Shillong, Naitung 13:
Ar ngut ki rangïalehkai karate ka Jylla u Gideon Tympuin bad u Daniel Dabiangbha Warjri kin mihkhmat ryngkat ka kynhun ïalehkai ka ri India sha ka 10th South Asian Karate Championships 2026 ka ban long ha Bangladesh naduh 15 haduh 19 tarik u Naitung 2026. Ka jingshah jied kine ki rangïalehkai ka dei lyngba ka jinglah ban ïalehkai bha jong ki ha ki lympung ïalehkai National Level. U Gideon u la khur ïa ka takma ksiar ha ka 5th KIO (Karate India Organisation) Senior & U21 National Karate Championship 2026 kaba la long dang shen ha New Delhi. Katba u Daniel u la khur ïa ka takma rupa ha ka 5th KIO Sub-Junior, Cadet & Junior National Karate Championship kaba la long ha Dehradun, Uttarakhand. U Gideon un ïakhun ha ka Men’s U-21 Individual Kata, katba u Daniel un ïakhun ha ka jingïakob Boys’ Junior Individual Kumite (- 68kg). Te kumta na ka liang ki nongïalam ka All Meghalaya Karate Do Association ki la ai khublei kitbok ïa kine ki rangïalehkai ba kin lah pynurlong ïa ka jingjop na ka bynta ban wanrah burom ïa ka Jylla bad ka ri india hi baroh kawei.
