Guwahati, Naitung:
U Myntri Rangbah ka jylla Assam u Himanta Biswa Sarma ha ka sngi Saitjaiñ u la ong ba ka sorkar jylla ka la sam ïa u khaw uba 1.34 lak Metric Tonne (MT) khlem donkam siew sha kumba 70 lak tylli ki longïing ha u bnai Naitung hapoh ka prokram pynbiang bam jong ka. U la pynbna ruh ba yn pyntreikam biang ïa ka jingsam ïa u dai masoor bad ka shini ba la ai jingïarap lyngba ka Public Distribution System (PDS) naduh u bnai Nailar, 2026. Haba ïasam ïa ka jingpynbna halor ka rynsan X, u Sarma u la ong ba ka jingthmu jong ka “Anna Sewa Se Jan Sewa” ka pyni ïa ka jingangnud jong ka sorkar ban pynthikna ïa ka jingbiang bam na ka bynta kawei pa kawei ka longïing bad ka dei kaba la ïoh mynsiem na ka jingïohi jngai jong u Myntri Rangbahduh ka ri u Narendra Modi. Katkum ka jingïathuh jong u Myntri Rangbah ka jylla, la pynbiang khlem jingsiew ïa u khaw haduh kumba 70 lak tylli ki longïing kiba ïoh jingmyntoi ha baroh kawei ka jylla Assam hapoh u bnai Naitung. U la ong shuh shuh ba ki nongïoh jingmyntoi kiba dei hok kin ïoh sa shisien ïa u dai masoor bad ka shini ba la ai jingïarap lyngba ka PDS kaba sdang ha u bnai Nailar, kaba ai jingkyrshan shuh shuh ïa ki longïing. Haba pynkynmaw biang ïa ka jingthmu jong ka sorkar halor ka jingpynbiang bam, u Sarma u la ong ba ka prokram “Anna Sewa Se Jan Sewa” ka long ban pynthikna ba ki marbam ba donkam kin poi sha ki longïing ha kylleng ka jylla.
