Aizawl, Naitung:
Ki bor synshar ha Mizoram ha ka 13 tarik, Naitung, ki la pynduh pyndam ïa ki dawai pynbuaid kiba shongdor palat 70 lak tyngka, ba kynthup ïa u Heroin bad Crystal Methamphetamine ha ka jingpyntreikam kaba la long ha ki bynta jong ka Serchhip Police Station.
Kat kum ka jingïathuh jong ki heh sorkar, ki mar ba la pynduh pyndam ki kynthup ïa 220 gram u drok heroin bad 89 gram u drok crystal methamphetamine, ïa kine baroh la ïoh ban kurup da ki pulit ha u snem mang tyngka 2025-26.U Methamphetamine, ba ju khot kum u “crazy drug”, u dei u dawa pynbuaid ïa ka jingmut jingpyrkhat bad uba pynkyrni bha ïa ki briew ban pyndonkam ïa u, une u jait dawai u dei uba la shah pyrkhing bha hapoh ki kyndon jong ka ri India. Ka jingpynduh ïa ki drok ba la ïoh kurup ka long shi bynta jong ka jingpyrkhing ka jylla ïa ka jingkhaïi drok bad ka jingkhaïi be-aiñ ïa u drok.
Ki pulit ka jylla Mizoram ki la pynjur ïa ki kam pyrshah drok ha kine ki bnai ba la dep. Tang ha ki hynriew bnai jong u snem 2026, kane ka kynhun ka la kurup ïa ki dawai pynbuaid bad ki dawai kiba dei na ka bynta ki jingmut jingpyrkhat jong u briew kiba shongdor palat T.414 klur bad la kem ïa 312 ngut ki briew kiba donkti bad ki kam runar ha kaba ïadei bad u drok, la ïathuh ki heh sorkar.
Ka jylla kaba ïasam ïa ki khappud ki ri ka pyrthei bad ka Myanmar bad Bangladesh, ka dang long ka lynti ïaid ba kongsan na ka bynta ki drok ba la pynpoi tuh sha India, kaba la pynlong ïa ki bor pynïaid aiñ ban pynjur ïa ka jingpyrshang ban pynjari aiñ.
