Shillong, Naitung 14
Ka Shillong Lajong FC ka la soi ïa u rangïalehkai bar ri uba nyngkong eh mynta u snem u Arthur Pangaro uba na Brazil bad kane ka la wan hadien ba ka la pyllait noh ïa ki ar ngut ki rangïalehkai kiba ka la pyllait noh ban leit ïasoh noh sha kiwei pat ki klob.
Ha ka aïom ïalehkai 2025-26, ka Lajong ka la pynmih tang da ki rangïalehkai kiba napoh ri India na ka daw ka jinghiran pisa, hynrei ka la lah ban wan shaduh ka kyrdan ba-ar bad kane ka long ka sien kaba nyngkong eh naduh ba ka la rung sha ka I-League (ba la tip mynta kum ka Indian Football League).
Da ka jingthmu ban jam sa shi kyrdan bad ba kane ka lympung ïalehkai kan nangkiew shaphrang, ka Lajong ka la pynkhlaiñ da kaba soi ïa utei u rangïalehkai ‘dien.
Ka jingwan ïasoh utei u rangïalehkai ba 26 snem ka long ban pynkhlaiñ ïa ka kynhun ïalehkai ha ka bynta kaba shadien, kaba don artylli ki jingduna namar kane ka klob dangshen ka la pyllait noh ïa u Saveme Tariang bad u Rudra Ved na ka bynta ban leit ïasoh sha kiwei pat ki klob.
Kumba ka paw u Arthur u la sdang ïa ka kam ïalehkai ha Brazil. Te kumta ka Lajong ka la wanrah haduh saw ngut ki rangïalehkai na Brazil ha ka aïom ïalehkai 2023-24 bad kumjuh ha 2024-25, hynrei u Arthur u la long tang marwei ban ïalehkai na ka bynta ka klob ha kane ka aïom ïalehkai 2026-27.
“U Arthur u la kiew lyngba ka phutbol jong ka Brazil bad u wanrah ïa ka jingkhlaiñ na ka bynta ka Lajong,” ong ka SLFC ha ka rynsan social media hynnin ka sngi.
Kumba ka long mynta ka Lajong ka dangpynkhreh na ka bynta ka Durand Cup 2026. Kane ka kynhun kan pynkhreh ïa ka jingïalehkai ba nyngkong ha ka 31 tarik mynta u bnai pyrshah ïa ka Nongkseh S&CC. Ka la rung sha ka semi final ha u snem 2024 bad 2025.
