Shillong, Naitung 14
Ka jingpynkhreh jong ka Argentina na ka bynta ka jingïalehkai semi-final jong ka FIFA World Cup 2026 pyrshah ïa ka England ka la ïaid shakhmat naduh ki buit ïalehkai haduh ka liang ka bor met.
Kane ka kynhun hapoh ka jingïalam u Lionel Messi, uba dangpynkhreh ban ïakhun pyrshah ïa ka England ha ka sien kaba nyngkong ha ka jingim ïalehkai jong u, ka dangwad ki lad ki lynti ban shim ïa ka kabu ksiar ha kane ka jingïakhun ka ban long ha step shiteng nynñia jong ka sngi Palei.
Na ka liang ki bor pynïaid kane ka kynhun ki la pan jingbit na ka FIFA ban phong jersey rong ‘navy blue’, kaba dei na ka bynta ka sopti jingïalehkai shabar (away kit). Kane ka jingkyrpad kam shym la long ban pynlong ka jingïapher bad ka England, ka ban phong da ka jersey rong lieh, hynrei ban pyni ïa ka jingkhlaiñ bor ha kane ka lympung.
Haba kine ki arliang mamla ki ïakynduh ha ka Quarter-Final jong ka World Cup jong u snem 1986, ka jingïalehkai ba paw jong u Diego Maradona ka “Hand of God” bad ka “Goal of the Century” ka la pynlong ïa katei ka kynhun na South America ban jop da 2-1 kol. Ka Argentina ka la phong ïa ka jersey ïalehkai kaba rong saw jong ka ha katei ka jingïalehkai kaba pawnam ha Mexico. Da kaba kyrpad ban phong ïa ka jersey rong ‘navy blue’ ha u snem 2026, te kumta ka Argentina ka la khmih lynti ban pynsah kynmaw ïa ka jingïakhun jong ka pyrshah ïa ka liang pyrshah.
Naduh ba ki la ïakynduh ha u snem 1986, ka Argentina bad ka England ki la ïakynduh sa arsien ha ka World Cup. Ha u snem 1998, ka Argentina ka la jop da 4-3 kol lyngba ka tie-breaker, hadien ba ka la ïakhaid da mar 2-2 kol.
Ha u snem 2002, u David Beckham u la ïoh da ka penalty na ka bynta ban pynlong ïa ka England ban jop da 1-0 kol. Lah ban kdew ba ka jingjop ka Argentina ha u snem 1998 ka la ïoh lyngba ka jingphong ïa ka jersey rong blue jong ka, katba ka jingshah rem jong ka ha u snem 2002 ka la jia ba la phong ïa ka jersey rong blue shai (light blue and white stripes).
Na ka liang ka FIFA ka la pynthikna ïa ka jingbhah na ka bynta kane ka jingïakhun semi final ha Atlanta: ka England kan phong ïa ka jersey rong lieh, katba ka Argentina kan phong ïa ka jersey rung ‘navy blue’ bad khleh rong ïong.
Haduh mynta ha ka World Cup 2026, ka Argentina ka la phong ïa ka sopti ba kongsan jong ka ha ki san tylli na ki hynriew tylli ki jingïalehkai jong ka, ha kaba ka la jop lut ïa ki baroh. Ki la jied ïa ka sopti bapher jong ki tang shisien mynshwa ha kane ka jingïalehkai ba ka la jop ïa ka Jordan da 3-1 ha Dallas.
