Imphal, Naitung:
Ka Delhi Meetei Coordinating Committee (DMCC) ha ka sngi Ba-ar ka la pynrem jur halor ka jingshah thang ym duna ïa ki 6 tylli ki ïing jong ki Meetei ha Kanto Sabal ha Imphal West district jong ka jylla Manipur ha ka 11 tarik, Naitung bad dawa ruh ba ka la dei ban don ka jingkitkhlieh na ki bor pahara.
Ha ka jingpynlait khubor, u Biramani Sanasam, u Coordinator ka DMCC, u la kynnoh ba la thang ïa kitei ki ïing, ha ka por ba ïaid paidbah ban ïakhih da ki riew sniew jong ka kynhun ki Kuki.
Ka komiti ka la ong ba katei ka jingjia ka long kaba shyrkhei bha namar ba la ïathuh ba ka la jia hapoh ka jingjngai kaba 50-100 meter na ka 57th Mountain Division bad ka Punjab Regiment camp ha Leimakhong, kawei na ki jaka ba bun bha ki shipai kaba ha kane ka thaiñ.
Da kaba pynshong nongrim ha ki jingthoh jong ki nongsakhi bad ki durkhih kiba la saphriang ha ki social media, ka DMCC ka la kynnoh ba ki nongthombor ki la phet krad namar ka jingïohi ïa ka ktem shipai bad buh jingkylli balei ym shym la khanglad ïa kane ka kam thombor bad ym shym la kem ïa ki nongleh kam sniew.
Ka komiti ka la kdew ruh ïa ka jingjah jong uwei u riew paidbah jong ka kynhun ki Meetei, u Kamal Babu, na katei ka juh ka jaka ha u snem ba la dep bad ong ba katei ka kam ka dang sah khlem lah ban pynbeit ne lap dien ei ei.
Napdeng ki ïing kiba la shah pynjot ka dei ka ïing jong u rangïalehkai phutbol barim ka ri India u Laitonjam Sanathoi.
Ka DMCC, ka ong ba katei ka jingjia, ka pynkynmaw ïa kiba bun ki nongshong shnong, ïa ka jingthombor, kaba la sdang naduh ka 3 tarik, Jymmang, 2023, ha kaba katkum ka jingïathuh katei ka seng, la ong ba palat 800 tylli ki ïing jong ki Meetei, ki la shah thang ha ki bynta bapher bapher jong ka jylla Manipur.
Ka seng ka la kynthoh shuh shuh ïa ka jingleh jong u MP ka Inner Manipur u Angomcha Bimol Akoijam haba u la leit sha katei ka jaka ba la shah ktah, da kaba kynnoh ba ka jingleh jong ki bor pahara ka pynpaw ïa ka jingbym kheiñ snep ïa u nongmihkhmat ba la jied bad ki paidbah ka jylla.
Katkum ka jingong jong ka DMCC, ki nongshong shnong jong ka Meetei bad Naga ki la pyrshang ban pynlip ïa ka ding bad ban ïada na ka jingshah pynjulor shuh shuh, hynrei ki bor pahara ki la khanglad ban leit sha katei ka jaka bad hadien ki la pynphai kylla da ki jingbom lathi bad ki la siat lyer pynsat khmat ïa ki paidbah.
Ka komiti ka la pynpaw ruh ïa ka jingbym hun halor ki jingkren ba la kren da u Govindas Konthoujam Myntri ka tnat ki kam pohïing ka jylla Manipur, da kaba kynnoh ba ki jingkren jong u ki pynshong nongrim ïa ka jingthang ïa ki ïing jong ki Meetei. Ka la khot ïa u Myntri Rangbah ka jylla bad ïa u Myntri ka tnat ki kam pohïing ba kin hiar shuki noh lada kim lah ban ïada ïa ka jingim bad ki jingdon jingem jong ki nongshong shnong.
Ka DMCC ka la kynnoh ba ki kam pahara ki paw ba ki long khlem akor ha ki jaka ba shong ki Meetei, katba ki jaka na kiba la sakhi ba ju kham mih ki jingthombor da ki tiar ïaleh ki jingpyntreikam jong ki bor pahara ki duna.
Haba pynpaw ïa ka jingsngewkhia halor ka jingpyntreikam ïa ka rukom khanglad ban pyndonkam da ki tiar pynmynsaw, ka komiti ka la ong ba katba ki kynhun Meetei ki la aiti ïa ki tiar hadien ka jingkyrpad jong u Lat, katto katne ki kynhun lehnoh Kuki kiba treikam hapoh ka Suspension of Operations (SoO) ki la pynpaw paidbah ba kin ym aiti ïa ki tiar lymda phiah ïa ka Manipur kumba dei ban leh ha ka rukom jong ki riewlum.
Ka seng ka la dawa ïa ka jingpynshai na ki bor ba halor halor ka jingbym lah jong ki bor pahara ban tuklar wat hapdeng ka jingpynjot ïa ki jingdon jingem jong ki paidbah bad ki riew shimet. Ka la wad ruh ban pynkut noh mardor ïa baroh ki jingkyrshan, jingai pisa bad jingïada kiba la kynnoh ba la pynjlan sha ki kynhun lehnoh Kuki katkum ka jingïateh SoO.
Napdeng kiwei pat ki jingdawa jong ka ki long ban pynpra bad pynduh tiar ïa ki kynhun lehnoh kiba treikam ha Manipur bad ban pynïoh biang ïa ka synshar khadar, ka aiñ bad ka suk ka saiñ ha ka jylla.
Ka DMCC ka la ong ba ka ïeng ha ka jingïatylli bad ki longïing kiba shah ktah bad ka la kyntu ïa ka sorkar ban pynthikna ïa ka jingshngaiñ jong baroh ki nongshong shnong bad ban pynngat ïa kiba donkti ha ka jingthang ïing ha ka aiñ.
