Shillong, Naitung 15
Ka Senegal ka la weng noh ïa u coach ka kynhun ïalehkai phutbol, u Pape Bouna Thiaw hadien ka jingbym lah ban ïalehkai bha ka kynhun jong u ha ka FIFA World Cup 2026.
Kane ka kynhun ka la ïashim bynta ha kane ka lympung da ka jingkhmih lynti ba kan lah ha ka ban ïalehkai bha hadien ba ka la pynliem ïa ka Morocco ha ka phainal jong ka Africa Cup of Nations kaba la long ha u Kyllalyngkot. Kiba bun ki ngeit ba ka lah ban ïakhun tyngeh na ka bynta ban rah ïa ka nam lahduh ha ka World Cup, hynrei ka Senegal ka la kut noh ka jingïaid lynti jong ka tang ha ka wat kaba ar.
Kane ka kynhun ka la mad ïa ka jingshah rem ar sien ha ka France bad Norway. Ha ka wat kaba ar, ka la tam ïa ka Belgium da 2-0, hynrei hadien ka la shah rem noh da 3-2 kol hadien ka ‘extra time’.
U Thiaw, uba 45 snem ka rta, u dei ruh uba la shah sospon haduh san tylli ki jingïalehkai ha u Nailur ha ka por ba ka Senegal kan ïakhun ïa ka lympung ïaknieh rung jong ka Africa Cup of Nations 2027. Kane ka rai sospon ka la pynlong ïa u ban ïalam ïa ka kynhun na shabar jong ka madan ïalehkai hadien ka jingpyrshah ka jong u ïa ka Morocco, kaba la ïoh da ka penalty ha ka phainal jong ka AFCON kaba la long ha u Kyllalyngkot ha Rabat.
