Shillong, Naitung 15
Ka Spain ka la pynkut noh ïa ka jingangnud ka France ban khur jingjop ha ka sien kaba lai ha ka World Cup, hadien ba ka la lah ban pynliem noh da 2-0 kol bad ka la jam sha ka final.
Ha ka jingshisha ki rangïalehkai u Didier Deschamps ki dei kiba don jingkyrmen ban rah ïa ka trophy hadien ba ki la ïalehkai bha ha ka ri America, hynrei ka la ïakynduh pyrshah ïa ka kynhun ïalehkai kaba kynsai na ka dawbah Europe ha ka semi final.
Ha kane ka jingïakhun u Mikel Oyarzabal u la pynkhih jar nyngkong na ka bynta katei ka kynhun kaba la khur jingjop ha u 2010, lyngba ka penalty ha ka kylla step ha Arlington, Texas bad u Pedro Porro u la pynbud ïa ka kol kaba ar ha ka kylla miet.
Ka jingïalehkai ha Dallas Stadium ka la pynkyndit ha ka por ba u rephri na Salvador u Ivan Barton u la kdew sha ka penalty hadien ba u rangïalehkai ‘dien jong ka France u Lucas Digne u la pynur ïa u rangïalehkai ka Spain u Lamine Yamal.
Te kumta u Oyarzabal um shym la pynlehnohei ïa kane ka kabu ksiar bad u rangapkol ka France, u Mike Maignan um shym la lah ban pyllait na ka jingshah thep. Kane ka long ka kol kaba san na ka bynta jong u ha ka World Cup bad ban pynlong ïa ka France ban shah tam ha ka sien kaba nyngkong ha kane ka lympung.
Hadien katto katne minit, ka France ka la mad biang ïa ka jingeh ha kaba u rangïalehkai ‘dien jong ka, u William Saliba u la hap ban mih noh na madan na ka daw ba u la ngat ha ka jingmynsaw, bad la pynmih bujli noh da u rangïalehkai ‘dien ka Crystal Palace u Maxence Lacroix.
Ka Spain ka la nangjan ban thep kol biang, hynrei ka jingïakhun tyngeh u Dayot Upamecano ka la long ka jingkhang lad ïa u Fabian Ruiz.
Te kumta ka France ka la pynkut ïa ka kylla step khlem da ïoh ban shut wat tang shisien ruh sha kol.
U Deschamps u la pynmih ïa u Desire Doue ha ka jaka u Bradley Barcola ha ka minit kaba 57 na ka bynta ban pynkhlaiñ ïa ka kynhun jong u, hynrei hadien shi minit, ka la shah thep biang sa shi kol ha ka kynhun jong u Luis de la Fuente.
U rangïalehkai ‘dien u Porro u la thep ïa katei ïa ka kol hadien ka jingïarap lang u Dani Olmo hapoh ‘box’.
U Deschamps u la pynrung ïa u Theo Hernandez bad u Rayan Cherki hadien ka jingsangeh ban ïadih um, hynrei kam shym la long ka jingïarap ïa kane ka kynhun bad ha kaba kut ka la mad ïa ka jingshah rem.
Kumba ka paw ka France ka la lah ban rung ar sien sha ka final ha ka World Cup, ha kaba ka la jop ha u snem 2018 ha Russia. Hynrei ha ki saw snem ba la lah, ka la shah rem noh lyngba ka tie-breaker ha ka Argentina ha Qatar watla u Mbappe u la khur ïa ka hat-trick.
