Shillong, Naitung 15
Ka Mawpdang SC bad ka Sei La Sap F&CC ki la rung sha ka final ha ka lympung ïalehkai Under-20 Fourth Division Football League ba la pynïaid da ka Shillong Sports Association.
Kine ki kynhun kin pynkhreh ban ïaknieh ïa ka nam lahduh ha ka jingïakhun phainal ka ban long ha ka sngi Saitjaiñ ha SSA Stadium, Polo ha ka por 3:30 nohphai sngi.
Ha ki jingïakhun semi final, ka Mawpdang ka la lah ban pynliem ïa ka Golflink SC da 2-1 kol bad ka Sei La Sap ka la jop da Weilyngkut Area FCC da 3-1 kol.
U Leo F Marbaniang u la thep ar kol ha ka minit kaba 23 & 62 bad u Mebaniohnam Lyngdoh- (72) na ka bynta ka Sei la Sap, katba ka Weilyngkut ka la pynphai kylla shi kol lyngba u Sengrak Sangma (70).
Te kumta ka Mawpdang bad ka Sei La Sap ki la kiew kyrdan sha ka Third Division ha kaba kin ïoh ban shim bynta naduh ka aiom ka ban wan.
