Shillong, Naitung 16
Sa tang shiphew sngi ki paidbah kin ïoh ban sakhi ïa ka lympung ïalehkai Shillong Premier League 2026, ka ban sdang ha ka 25 tarik mynta u bnai ha kaba ka lahduh jong ka aïom ba la lah, ka Langsning FC kan ïakhun nyngkong pyrshah ïa ka Sawmer SCC.
Ïa kane la pynbna da ka Shillong Sports Asso-ciation hadien ba la pyllait ïa ka prokram ïalehkai jong kane ka lympung ha ka sngi Palei ha kaba ka la pynthikna ïa ki tarik jong ki hynñiew tylli ki jingïa-lehkai lem bad ka por ïalehkai.
Kiwei pat ki phra tylli ki kynhun ki ban shim bynta ha ka SPL mynta u snem ki long ka Shillong Lajong FC, Mawlai SC, Nangkiew Irat SC, Rangdajied United FC, Laitkor SC, Mylliem SC, Nongkseh SSCC bad ka Meghalaya Police (kiba la kiew kyrdan na ka First Division 2025).
Kumba long ha u snem ba la lah, ka SPL mynta ka aïom kan don tang kawei ka wat jingïakhun ne single leg ha kaba ka kynhun ka ban bat ïa ka kyrdan ba hakhlieh ha ki 45 tylli ki jingïalehkai kan rah ïa ka nam lahduh. Katba ki ar tylli ki kynhun ki ban wan ha ki kyrdan ba shatrai kin shah pynhiar kyrdan sha ka First Division.
Shuh shuh ka SSA kan pynbna ruh ba kan pynlong biang ïa ka Super Cup ha ka sien kaba ar. Kane ka lympung kan kynthup lang ki hynriew tylli ki kynhun ïalehkai ki ban wan ha ki kyrdan shakhmat ha ka SPL. Ki ar tylli ki kynhun ki ban wan ba nyngkong bad ba-ar kin ïoh rung sha ka semi final, katba kiwei pat ki kynhun ki ban wan naduh ka kyrsan ba lai haduh ba hynriew kin hap ban ïakhun ïa ka ‘playoff’ khnang ban ïoh rung sha ka semi final.
Shuh shuh ïa kane ka lympung mynta ka aïom yn pynïaid ha ryngkat ki kyndon ïalehkai kiba thymmai, kaba kynthup ïa ka kyndon jong ka 10 sekon ban pynmih bujli ïa ki rangïalehkai, hapoh san sekon ban sdang biang ïa ka jingïakhun bad kiwei kiwei ki kyndon .
Kawei na ki kyndon kaba ki rangïalehkai kin hap ban phikir bha ka long ka red card kaba lah ban ai sha uno uno u rangïalehkai lada jia ba u tap ne da ïa la ka jong ka shyntur ha ka por ba u ïakren bad u rangïalehkai ka liang pyrshah, kaba long kum shi bynta ban pyndonkam ïa ki kyntien pynshit, pyndom ne kino kino ki jait kyntien.
Shuh shuh ban nang kham pynjanai ïa ka lympung hi baroh kawei, manla ki klob ba ïakhun kin hap ban pynrung ïa ka kyrteng ki rangïalehkai (register) ha ka thup lum kyrteng ne ka Centralised Registration System (CRS) jong ka All India Football Federation (AIFF).
Ha kaba ïadei pat bad ki coach, ki klob ki donkam ban don ïa ki coach kiba la don ïa ka kyrdan AFC A ne B Licence ne kino kino ki licence kiba ïa ryngkat bad kine ki lah ruh ban dei kiba don ïa ka Diploma ha ka kam ban ai jinghikai ïa ka Sports (Coaching) na ka National Institute of Sports (NIS).
