Shillong, Naitung 16
Ka khlur ïalehkai badminton ka ri kaba la khur takma arsien ha ka Olympic, ka PV Sindhu ka la lah ban pynpaw ïa ka jingtbit ha kaba ka la pynliem noh ïa ka ‘thei ïalehkai kaba bat ïa ka kyrdan basan ha ka pyrthei, ka Han Yue na China bad ka la jam sha ka quarter final jong ka Japan Open Super 750 badminton tournament ha ka sngi Palei.
Katei ka ‘thei ïalehkai kaba don ha ka kyrdan ba shiphew ha ka pyrthei, ka la shimpor tang 35 minit ban khur ïa ka jingjop da 21-16, 21-14 pyrshah ïa katei ka nongïalehkai ba kynsai ka China ha ka wat kaba ar.
Kane ka ‘thei ïalehkai kaba la bat teng ïa ka nam lahduh ha ka pyrthei, ka la lah ban ïalehkai bha ha kane ka jingïakhun ka wat kaba ar, na ka bynta ban tam da 8-0 hashwa ba kan khur ïa ka jingjop.
Kane ka ‘thei ïalehkai ba la 31 snem ka rta kan pynkhreh ban ïakhun pyrshah ïa ka nongïalehkai na Japan ka Nozomi Okuhara, kaba la jop da ka ‘walkover’ hadien ba ka An Se-young na South Korea ka la weng noh ïalade na kane ka jingïakhun.
Kumba ka paw ka Sindhu ka la long tang marwei ka nong India kaba dangsah ha kane ka lympung hadien ba ki shijur ki nongïalehkai kata ka Tanisha Crasto bad u Dhruv Kapila ki la shah rem noh ha ka pre-quarter final.
