Imphal, Naitung:
Na ka jingjia jong ka jingshah pynïap jong ki ar ngut ki shipai ka tnat Assam Rifles ha ka jinghiar thma jong ki lehnoh ha Ukhrul distrik jong ka jylla Manipur, ka kynhun CRPF ka la pynkhlaiñ shuh shuh ïa ka Standard Operating Procedure (SOP) na ka bynta ban pynkhlaiñ ïa ka jingtreikam jong ki shipai kiba don ha katei ka jylla kaba la shah ktah ha ki kam thombor.
Uwei u heh jong ka tnad pahara u la ïathuh ha une u nongthoh khubor ba la bthah ïa ki kynhun CRPF ban kiar na kano kano ka jingleit jingwan khlem da thmu kum shi bynta ban pynkhlaiñ ïa ki lad pahara.
“Ngi la kyrpad ïa ki heh jong ki kompeni jong ngi ban sangeh noh ïa kano kano ka rukom ïaid khlem da thmu,” ong une u heh sorkar bad bynrap ba ka SOP ba la pynkylla thymmai ka thmu ban pynduna ïa ki jingma ïa ki bor pahara kiba treikam ha ki jaka ba rit paid.
Ban pynkhlaiñ ïa ka jinglah ban treikam, ka CRPF ka la buh ym duna ïa ka 100 tylli ki kali Armored ha Manipur na ka bynta ban pahara man ka por bad ki jinglehkai ban synshar ïa ki jaka. Ka tnad kam pohïing ka la buh ruh ïa ki ar tylli ki kynhun shipai jong ka CRPF’s CoBRA (Commando Battalion for Resolute Action) ha ka Jylla.
Katkum ka jingong jong une u heh sorkar, baroh ki briew jong ka CoBRA ki la shah hikai kyrpang ha Silchar shwa ban phah sha ki kam pyrshah lehnoh ha Manipur.
U heh shipai u la ong ba ki la don shuh sa palat 300 tylli ki kynhun jong ki puli ka Central Armed Police Forces kiba la treikam ha kylleng ka jylla. Ka jingpynkynriah ka kynthup ïa ki 21 tylli ki kompeni jong ka Assam Rifles, 206 tylli ki kompeni jong ka CRPF, 100 tylli ki kompeni jong ki shipai BSF, hynriew tylli ki kompeni jong ka SSB bad san tylli ki kompeni jong ka ITBP, kaba pyni ïa ka jingpyrshang ba bteng jong ka sorkar pdeng ban pynneh pynsah ïa ka suk ka saiñ.
Ha kajuh ka por, ki kot ki sla jong ka sorkar ki la pynpaw ba ki bor pahara ba ïatreilang ki la ïoh ban kurup shibun ïa ki tiar ïaleh bad ki kuli ha ki jingkhynra ba dang shen ha Manipur.
Ka jaka buh tiar ba la kurup ka kynthup ïa 11 tylli ki suloi AK-series, lai tylli ki suloi M-series, hynñiew tylli ki Rocket-propelled grenades (RPG), ki bom bad kiwei kiwei ki tiar, kaba pyni ïa ka jingpyrshang ba bteng ban tehlakam ïa ki kam lehnoh bad ban ïoh biang ïa ki tiar beaiñ na ka thaiñ ba shah ktah ha ka jingïakynad.
Hadien katto katne kynta jong ka jingkhynra ha ka District Senapati jong ka Manipur, la kynnoh ba ki paidbah ki la thombor ïa kawei ka ktem jong ki shipai Assam Rifles, da kaba ki la kawang maw, ki la pynjulor ïa ki jaka bad ki la thang ïa lai tylli ki kali jong ki bor pahara, la ïathuh ki heh sorkar ha ka sngi Balang.
Kane ka jingïakynad, ka la jia ha ka district town camp jong ki shipai Paramilitary, ha ka por 9.30 baje mynstep jong ka sngi Ba-ar, ha kaba ki paidbah ki la pynjulor ïa ki jingker, ki la ïathuh.
Da kaba pynshong nongrim ha ki jingtip ba lah ban ngeit ha kaba ïadei bad ka jingdon jong ki shipai kiba don tiar ïaleh ha ka jaka ba kongsan jong ka Makuilongdi, kaba jngai haduh 2 km shaphang sepngi jong ka ktem ba la buh kyrpang jong ki shipai NSCN (IM) ha Oklong, la sdang ïa ka jingpahara bad jingkhynra ïa ka jaka da ki shipai Assam Rifles, la ong u Defence PRO ha ka kyrwoh.
“Ki khubor wad bniah bad ki jingthoh ha ki lad pathai khubor ki pyni ïa ka jingdon jong ki shipai kiba don tiar ïaleh kiba ïaid shabar jong ki jaka sah ba la buh kyrpang, kiba rah tiar ïaleh bad kiba phong ïa ki jaiñ uniform, kaba paw kum ka jingpynkheiñ ïa ki kyndon pynsangeh thma ba la buh,” la ong u heh sorkar, da kaba bynrap ba ïa ki jingpynkheiñ ba la pyntip la pyntip thikna sha ka Ceasefire Monitoring Group (CFMG).
Ha ka jingïaid jong katei ka jingkhynra, ki shipai jong ka Assam Rifles ki la leit shajan ka shnong Makuilongdi bad Oklong, bad ki nongshong shnong kynthup ïa ki kynthei ki la khanglad ïa ki, la ong ka khubor.
Katba ka jingkulmar ka nangjur, ki khubor ki la mih ha ka por kumba 9 baje eiei mynmiet ba ki paidbah kiba bun ki la ïalum lang ha ka nongbah Senapati bad ki la pynkhreh ban ïaid paidbah sha ka ktem jong ki shipai Assam Rifles, ong une u heh shipai.
Wat hapdeng ka jingweng noh ïa ki lum, hynrei ka kynhun kaba heh ka la poi ha katei ka ktem ha ka por kumba 9:30 PM eiei, ka la kawang maw, ka la pynjulor ïa ki mar ki mata bad ka la pyrshang ban thang, la ong ka kyrwoh. Kane ka ktem ka don ha Naga Taphou ha ka distrik.
Ki paidbah ki la pynjulor bad pynjulor ïa ki kali jong ka Assam Rifles, la ong ka khubor, da kaba bynrap ba “kawei ka kali rit ka la shah thang, katba ar tylli ki trok ki la kylla bad shah pynjulor, bad kawei ka kali jong uwei u riew paidbah ruh ka la shah thang ha ka por ba don ka jingïakynad”, la ong uwei pat u heh shipai.
