Shillong, Naitung 19
Ka kynhun ïalehkai U-12 jong ka Minerva Aca-demy FC ka la khur biang sa kawei ka nam jop ha ka lympung ïalehkai bar ri da kaba la rah ïa ka nam lahduh ha ka Gothia Cup (World Youth Cup) hadien ba ka la pynliem noh ia ka kynhun ïalehkai na Brazil ka RS Sports Yellow da 2-1 kol ha ka final kaba la long ha ka sngi Saitjaiñ ha Gothen-burg, Sweden.
Kane ka nam jop ka la wan urlong lyngba ki kol ba la thep da u rangïalehkai na ka jylla Meghalaya u Mekham -khraw Nongrem lem bad u Thangsanglen Kipgen.
Kane ka jingjop ka la wan hadien ar taïew ba katei ka kynhun jong ka shlem ai jinghikai na Chandigarh ka la khur jingjop ha ka Helsinki Cup, kaba long sa uwei pat u mawjam ha ka jingleit ïalehkai sha ka dewbah Europe.
Kumba ka paw ka Minerva Academy ka la long ka kynhun kaba khlem shah rem naduh kaba sdang katei ka lympung ha kaba ha ka jingïalehkai ‘group’ ka la jop ïa ka Prep Schools Pumas Blue (England) da 12-0 kol, ïa ka Lil-lestrom SK 3 (Norway) da 13-1 kol bad ïa Surte IS FK (Sweden) da 16-0 kol.
Ha ka wat kaba ar (Round of 64) ka la Minerva ka la jop ïa ka Legacy Academy (Kenya) da 6-2 kol, ha ka wat kaba lai (Round of 32) ka la jop ïa ka Prep Schools Lions (England) da 10-1 kol. Ha ka pre-quarter final ka la jop da 17-1 kol ïa ka OFC Couronnes (France). Ha ka quarter final ka la pynliem ïa kla Cancheritos FC (Bolivia) da 8-0 kol bad ha ka semi final ka la jop da 3-2 kol ïa ka FC Lokomotyv Kyiv (Ukrai-ne) hashwa ba kan pynliem sa ïa katei ka kynhun kaba na Brazil.
Nalor u Mekham-khraw, u Donald Mar-thong u la don lang hapoh kane ka kynhun ïalehkai ka Minerva ryngkat kiwei ki rangïalehkai ka thaiñ shatei lammihngi kiba kynthup ïa u Korou Meitei Khundongbam, Nganba Meitei Khun-dongbam, Reewan Singh Thounaojam, Paikhomba Khundrakpam, Potovei Chapao, Seiminsang Khongsai, Thangsang- len Kipgen bad u Wangshem Konyak.
