Shillong, Naitung 19
Ka England ka la pynliem nohïa ka France da 6-4 kol ha ka jingïaknieh ïa ka kyrdan balai ha ka FIFA World Cup bad u Kylian Mbappe u la long u rangthep kol ba bun eh ha kane ka lympung ïalehkai.
Baroh ar kine ki kynhun ki la lah ban ïalehkai bha ha kane ka lympung, hynrei ki la kut noh ka jingïaid lynti ha ka semi final hadien ba ka France ka la shah rem ha ka Spain, katba ka England ka la shah rem ha ka Argentina.
Ha kane ka jingïakhun kaba la long ha ka step jong ka sngi U Blei, baroh ar ngut ki coach jong ki arliang mamla ki la wanrah ka jingkylla wat hapdeng ka jingshit kyrang ha Miami, da kaba pynshong ïa ki khlur ïalehkai.
U coach ka England u Thomas Tuchel u la pynshong shwa ïa u Harry Kane bad u Jude Bellingham ha kaba sdang kane ka jingïakhun, katba u Deschamps u la pynshong shwa ïa u Bradley Barcola bad u Ousmane Dembele.
U rangïalehkai shapdeng ka Arsenal u Declan Rice u la pynkhih jar nyngkong eh na ka bynta ka England bad ïa kawei pat la pynbud da u Ezri Konsa na ka bynta ban tam da 2-0.
Watla u Kylian Mbappe bd u Michael Olise ki la pyrshang ban ïakhun tyngeh na ka bynta ka France, hynrei kim shym la lah ban pynurlong na ka daw ka jingïashan tyngeh u rangapkol ka England u Dean Henderson.
Kane ka kynhun jong ka France ka la shah thep biang ïa ka kol kaba lai lyngba u Bukayo Saka (37). Une u rangïalehkai shakhmat u la thep biang ïa ka kol kaba ar ka jong u ha ka minit kaba 45+1 na ka bynta ban tam da 4-0 kol ha ka kylla step.
Na ka liang u Deschamps u la pynmih ïa u Dembele, Dayot Upamecano, Lucas Digne bad u Barcola ha ka kylla miet, ha kaba kane ka kynhun ka la lah ban pynphai kylla lyngba u Mbappe, uba la thep ï aka kol kaba khyndai jong u ha kane ka lympung na ka bynta ban tam ïa u Lionel Messi bad u la don jingkyrmen ban ïoh ïa ka khusnam Golden Boot.
Kane ka kynhun ka la thep biang ïa ka kol kaba ar lyngba u Barcola, ïa uba u coach kane ka kynhun ka la pynshongben ha kaba sdang kane ka jingïakhun.
U Mbappe u la thep biang ïa ka kol kaba ar jong u na ka bynta ban long u rangthep kol ba kynsai ha ka World Cup da kaba tam 2 kol ïa u Messi.
Watla ka France ka la ïakhun tyngeh ban pynïakhaid, hynrei ka la shah thep biang hadien ba u Malo Gusto u la pynur ïa u Djed Spence hapoh ‘box’. Te u Saka um shym la pynlehnohei ïa kane ka kabu ksiar na ka bynta ban khur ïa ka hat-trick.
Hashwa ban wai u Dembele u la ïoh ban thep shi kol na ka bynta ka France, hynrei u Bellingham u la thep ïa ka kol kaba khatduh bad ban pynlong ïa ka England ban tam da 6-4 kol bad ban khur syndon ïa ka jingjop. U Bellingham u la long u rangïalehkai ba nyngkong eh na England ban thep 7 kol ha ka World Cup.
