Shillong, Naitung 19
Ka PV Sindhu ka la pynliem noh ïa ka Akane Yamaguchi na ka bynta ban long ka lahduh ha ka Japan Open bad kaba nyngkong ha ka Super 750 ha ka sngi U Blei ha Tokyo.
Kane ka khlur ïalehkai badminton ka ri kaba la khur ar ki takma ha ka Olympic, ka la long kaba nyngkong eh na India ban jop ha ka Japan Open hadien ba la lah ban jop ïa katei ka lahduh ha ka pyrthei da 21-17, 21-17. Kane ka nam jop ka la pynkut noh ïa ka jingbym lah ban pynurlong jong ha la palat ar snem bad kane ka long ka jingjop kaba khraw naduh ba ka la jop ha ka World Championships ha u snem 2019.
“Ka la long ka lympung ïalehkai kaba pyntieng,” la pynpaw ka Sindhu ha kane ka jingïaid lynti lyngba ka Dubai hapdeng ka thma jong ka US bad ka Iran.
Ka lympung ïalehkai kaba ka Sindhu ka la khur jingjop khatduh ka dei ha ka Syed Modi Internatio-nal ha u snem 2024.
Ka Yamaguchi ka dei kaba la ju ïalehkai haduh hynriew sien ha ka final jong ka Japan Open, katba ka Sindhu kam pat ju lah ban pynliem ïa katei ka khlur ïalehkai na Japan ha ki saw snem ba ki la ïakynduh teng.
Ka jingïakynduh jong ki ha ka Malaysia Open ha kaba sdang jong une u snem ka la kut noh hadien ba ka Yamaguchi ka la shongthait noh hadien ba la sdang ha kane ka lympung. Ha ki saw tylli ki jingïalehkai, ka Sindhu ka la jop ïa ka ha ka ha ka Thailand Open ha u snem 2022.
Haba phai sha ka jingïalehkai ha ka sngi U Blei, ka Sindhu ka la pyrshang ban ïakhun tyngeh naduh kaba sdang ha kaba la tam da 3-0 hashwa ba ka Yamaguchi kan pynïakhaid mar 3-3. Hadien ka Sindhu ka la tam da 8-6 hadien ba ka ïoh katto katne poiñ bad hadien ba la bteng ban tam biang da 9-6.
Hadien ka jingshongthait shipor, ka Sindhu ka la lah ban pynïakhaid mar 11-11. Hadien katto katne por ka Sindhu ka la lah ban tam da 19-17. Watla katei ka nongïalehkai na Japan ka la tam da 4-12, hynrei ka Sindhu ka la lah ban tam da 17-14 bad hadien da 19-17 hashwa ba kan khur syndon ïa ka jingjop.
