Jowai, Naitung 20
Ka West Jaiñtia District Sports Association (WJDSA) ka la pynkup burom ïa u District Sports Officer (DSO) barim ka West Jaiñtia Hills District u Bah Khroobok Passah halor ki jingnoh synñiang ba radbah jong u ban kyntiew ïa ki kam ïalehkai hapoh ka district.
Mynta une u ophisar u la shah kyntiew kyrdan kum u Assistant Director ka tnat ïalehkai ka Sorkar Jylla.
Ha ka jingïalang pynkup burom kaba la long ha ka sngi Saitjaiñ, la ïadon lang ki nongïalam bad ki dkhot nongkitkam ka WJDSA kynthup ïa u Working President Bah EMH Passah, u General Secretary Bah Lammat Laloo, ki bahaïing hasem jong u Bah Passah nalor kiwei pat.
Kum ka jingithuh ïa ka jingshakri bad ka jingnoh synñiang ka jong u Bah Khroobok, ka WJDSA ka la pynkup burom da ka sati ksiar, ka jaiñ ryndia nalor kiwei kiwei ki jingai sngewbha.
U Bah Passah ha ka jingkren jong u, ula pynpaw ka jingkmen halor ka jingkiew jong ka district ha ka jingïalehkai phutbol hapoh ka jingïalam jong u. Kaba kham paw ka long ba lai tylli ki skul na katei ka district ki la ïoh ban mihkhmat ïa ka Jylla ha ka International Subroto Mukherjee Football Cup ha ka nongbah Delhi.
U Bah Khroobok u la kdew ruh ïa ki jingpyrshang ba dangïaid shakhmat ban pynheh ïa ka madan ïalehkai ha Kiang Nangbah, ka projek kaba la shim khia ryngkat bad ka jingïatreilang bad u MLA ka Jowai u Bah Wailadmiki Shylla, kumjuh ruh ka jingpdiang ïa ka 6th Meghalaya Games kaba jop hapoh ka district.
Te kumta u la kyntu ruh ïa ki dkhot jong ka WJDSA ban bteng ïa ka jingaiti jong ki ban kyntiew ïa ka jingïalehkai ha ka distrik, da kaba pynksan ba ka jingïalehkai ka long kum ka lad kaba kongsan bha na ka bynta ka jingai kam ïa ki samla.
