Mawkyrwat, Naitung 20
Ka Nonglang Sports Club ka la pynhap pyrda noh ïa ka lympung ïalehkai phutbol ba tip kum ka Nonglang Interdong Football Tournament 2025-26 jong ki rangbah ba 30 snem shaneng ha madan Pynden Ïewlyngdoh, Nonglang, South West Khasi Hills District.
Ïa ka nam lahduh ha kane ka lympung la rah da ka Dong Nongdom hadien ba ka la pynliem noh ïa ka Dong Mawphorkynbat da 4-1 kol bad u George Franky Snaitang u la khur ïa ka hat-trick da kaba thep marwei haduh saw kol.
Ha ka jingïalehkai jong ka kylla step ka Dong Nongdom ka la pynkhih jar nyngkong eh lyngba ka penalty ba la shut da u George Franky ha ka minit ba 18 bad ka la tam da sh kol haduh bakut ka kylla step.
Ha ka kylla miet, u George Franky u la thep biang sa lai kol kata ha minit ba 46, minit ba 50 bad haka minit ba 58. Na ka liang ka Mawphorkynbat ka la lah ban pynphai kylla shi kol ha la minit kaba 64 lyngba ka penalty ba la shut da u Filterman Rmiat hashwa ba kan mad ïa ka jingshah rem.
Ïa ka nam Best Player la ïoh da u Pyrkhatbha Shangdiar (Nongdom), Best Defender ka leit sha u Mishel Wanniang (Mawphorkynbat), Top Scorer sha u Bah George Franky Snaitang (Nongdom), Best Goalkeeper la ïoh da u Walterjune Kharlyngdoh (Nongdom) bad ïa ka nam Man of the Match la ïoh da u Maxwellpaul Snaitang (Nongdom).
Ïa kane ka lympung la wan ban pynhap pyrda da u Bah S.K Budnah, uba long u riew rangbah jong ka thaiñ ha ryngkat ka jingdonlang u Myntri Shnong ka Nonglang u Bah Firsterlin Kharraswai, kumjuh u President ka Nonglang Sports Club Bah Syntarlin Snaitang, u Secretary Bah Kordorlyne Kharlyngdoh bad kiwei kiwei ki riew rangbah bad ki samla jong ka shnong.
