Shillong, Naitung 20
Watla u rangïalehkai phutbol ka Spain u Lamine Yamal u la lah ban pynurlong na ka bynta ban rah ïa ka nam lahduh ha ka World Cup, hynrei u para jong u, u Kenye uba dang ha ka rta ba dangrit, u la long uba kham paw.
Une u heprit uba dang ha ka rta kaba 3 snem ka rta, u la paw stet bha ha ki rynsan social media, hadien ba u la lehkmen halor ka jingjop ka Spain pyrshah ïa ka Argentina da 1-0 kol ha ka step jong ka lah sngi U Blei.
Katba u Yamal, uba dang 19 snem ka rta, u la bteng ïa ka jingkyrshan ban ïarap ïa ka Spain ba kan ïoh ïa ka khusnam kaba heh duh ha ka phutbol bad dei kane kaba pynlong ïa u para jong u ban lehkmen lang bad la u hynmen.
Naduh ka jingpaw ïa ka sur kren jong u ha ka screen kaba heh haduh ka jingïalehkmen lang bad la u hynmen, u Kenye u la ïoh ka jingïaroh na ki paidbah nongkyrshan kum uwei na ki khlur ba paw bym lah khmih lynti ha kane ka lympung ïalehkai mynta u snem.
Kumba ka paw kane ka jingïakhun ka Spain ka la lah ban ïalehkai bha naduh kaba sdang bad dei ha ka minit kaba 106 jong ka ‘extra time’ ba ka la lah ban pynliem ïa ka Argentina ha New Jersey Stadium kaba ha New York.
Kane ka long ka kynhun ïalehkai kaba ar ban khur jingjop ha ka World Cup ïa kaba la lamkhmat da u Yamal uba dangkhynnah ban jop ha ka European Championship bad kumjuh ha ka World Cup.
U para ba dangrit jong u, u Kenye, u la kylla long uba paw ha madan lane shabar ha ka TikTok jong u Yamal bad uba don ïa ki nongkyrshan ha kylleng ka pyrthei.
Une u heprit uba la paw kum uwei u ban sa bud ïa ki dienjat jong u hynmen, u dei u khun jong ka kmie u Yamal ka Sheila Ebana.
Haba pynpaw shaphang u Kenye, u Yamal u la ong , “Nga sngewtynnad haba nga ïohi ïa u para barit jong nga ba u kmen haduh katne, kumjuh ruh ban ïohi ïa ka kmie bad ki paralok jong nga kiba ju angnud ba ngan poi shaduh kane ka thong.”
“U para ba dangrit jong nga u la ai jingkmen ïa nga bad nga ïeit eh ïa u. Nga sngew ïa u kum la u jong u khun.”
Kumba ka paw kane ka long ka sien kaba nyngkong eh ïa ka Argentina ba kam shym la ïoh ban thep kol haduh kaba kut ki 90 minit bad wat u Lionel Messi um shym la lah ban pynurlong. Katba ka Spain ka la ïoh ïa ki kabu kiba biang, hynrei na ka jingtbit u rangapkol u Emiliano Martinez kam shym la lah ban pynurlong.
Hapdeng kane ka jingïai bteng ban ïakhun tyngeh ba ka la lah ban pynurlong ha ka ‘extra time’ lyngba u Ferran Torres hadien ka jingïarap pynbuh da u Nicholas Williams.
