Kohima, Naitung:
Ka sorkar Nagaland ha ka 19 tarik, Naitung, ka la pynbna ïa ki lad jingïarap, hadien ka jingtwa khyndew kaba la pynïap briew ha ka sor Mon, kaba la shim ïa ki mynsiem briew bad kaba la pynjulor ïa ki jingdon jingem bad ki jingtei, ha kaba u Myntri Rangbah ka jylla u Neiphiu Rio, u la pynbna ïa ka jingai jingïarap kaba T.4 lak na ka bynta ki longïing kiba la shah ktah.
Ha ka jingpynbna paidbah, ka sorkar ka la pynpaw ïa ka jingsngewsih kaba khraw halor ka jingtwa khyndew kaba la jia ha ka por kumba 6:30 baje mynstep jong ka Sngi U Blei, da kaba pynpaw ïa ka jingsngewlem sha ki longïing kiba la duh noh bad kitbok kitrwiang ïa kito kiba la mynsaw ba kin koit noh kloi.
Ka sorkar ka la ong ba ka dang buddien bha ïa ka jingktah jong ka jinglong ka suiñbneng kaba jur bha kaba dang ïaid ha kylleng ka jylla. Nalor ka Mon distrik, ka Tuli subdivision ha Mokokchung distrik bad katto katne kiwei pat ki jaka ki la shah ktah ha ka jingtwa khyndew, ka jingshlei um, ka jingkhang surok, bad ka jingshah pynjulor ki jingtei paidbah bad ki mar ki mata jong ki riew shimet.
Ïa ki kam pynlait im bad ai jingïarap la pynlong da ka Nagaland State Disaster Management Authority (NSDMA), District Disaster Management Authorities (DDMAs), ki bor synshar jong ki District, ki State Disaster Response Force (SDRF), ki pulit jong ka jylla bad kiwei kiwei ki tnad. Ki bor synshar ki dang ïatreilang ha ki kam wad bad pyllait im, ban pynkynriah ïa ki nongshong shnong kiba rit paid, ban pynphai biang ïa ki jingshakri kiba donkam bad ban ai jingïarap mardor ïa ki longïing kiba shah ktah.
U Myntri Rangbah u la pynbna ban ai jingïarap pisa shuh da T. 4 lak sha ki bahaïing hasem jong uwei pa uwei u briew uba la khlad bad T.74,000 sha uwei pa uwei u briew uba mynsaw. Ka sorkar ka la pynthikna ruh ba ki longïing kiba shah ktah kin ïoh ïa ki marbam, ki jaka sah ba shipor, ki marbam ba donkam bad kiwei kiwei ki jingïarap kiba biang.
La bthah ïa baroh ki tnad kiba ïadei kam ban long kiba husiar bha bad ban pynthikna ïa ka jingïatreilang kaba khlem jingeh na ka bynta ka jingpynkhreh kyrkieh, ka jingpynphai biang ïa ka jingpynïasoh bad ki jingpyrshang ban pynbha pat. Ka sorkar ka la ong ba ka jingpeit bniah kaba bteng ïa ka jinglong jingman ka dang ïaid shakhmat bad yn ai jingïarap shuh shuh ha kano kano ka jaka kaba donkam.
Haba ai jingmut ïa ki nongshong shnong ban long kiba husiar, ka sorkar ka la kyntu ïa ki briew ban kiar na ki jaka ba lah ban shah ktah, ki rud wah bad ki jaka ba lah ban twa khyndew, ban bud ïa ki jingbthah ba la pynmih da ka NSDMA, ka tnad kam pohïing bad ki bor synshar distrik, ban ïatreilang bad ki tnad ba treikam kyrkieh, bad ban kiar na kaba pynsaphriang ïa ki khubor lamler ne ki khubor bymman.
Ha ka jingthoh halor ka rynsan X, u Myntri Rangbah u la ong, “Ki khubor ki long kiba pynsngewsih bha shaphang ka jingtwa khyndew kaba jur ha Mon. Ka jingsngewlem jong nga sha kito kiba la duh noh ïa kiba ïeid ba thoiñ. Ka sorkar jylla ka dang buddien bha ïa ka jinglong jingman. Ka NSDMA, ka Dist. Admin, DDMA, SDRF, Police, AR bad ki kynhun ka shnong ki la trei shitom na ka bynta ban leit wad bad pyllait im ïa ki lanot.”
