Shillong, Naitung 20
Ka Mawpat Football Academy ka la long ka lahduh ha ka Women’s League Football Tournament, hadien ba ka la jop da 4-2 kol pyrshah ïa ka Lumshyiap Sports Club ha ka jingïakhun final kaba la long ha ka sngi Saitjaiñ ha madan Shisha Turf Town kaba ha Mawlai Mawroh.
Ïa kane ka lympung ïalehkai phutbol jong ki kynthei la pynïaid da ka trai jong ka Shisha Turf Town. Ka Mawpat FA kum ka lahduh ka la ïoh khung ïa ka song pisa ba T. 20,000 tyngka bad kaba wan ba-ar ka Lumshyiap SC ka la ïoh T. 10,000 tyngka.
Ha katei ka sngi la sam ruh ïa ki khusnam shimet ha kaba ïa ka nam Top Scorer la ïoh khur da ka Ïaraplang Nongrum na Lumshyiap SC, ka Sara Myrchiang kum ka Best Goalkeeper bad ka Dapynhun Lyndem kum ka Best Player, baroh ar ngut ki dei na Mawpat FA.
Ha katei ka sngi kut la sakhi lang da u Bah P.T Sawkmie, MLA barim kum u kongsan ha ka jingdon ryngkat u rangbah shnong Bah HBR Lyngdoh Nongpiur, Secretary shnong Bah P.M Hynñiewta, Bah Peter Lamare, ka samla Wanri Lyngdoh Nongpiur, ka Kong Shisha L. Nongpiur bad kiwei kiwei.
Haba ai jingkren u Bah Sawkmie u la kyntu ïa ki samla ïalehkai ba ki donkam ban trei shitom bad kut jingmut, khnang ba kin kiew ha ki jingïalehkai jong ki.
Ha kajuh ka por u la ïaroh ruh ïa u Myntri Rangbah ka Jylla u Conrad K. Sangma, namar ka jingdon mynsiem jong u ha ki kam ïalehai, kan sa poi ka por ba ki ‘thei ïalehkai ka Jylla kin sa ïohlad ban ïalehkai ha ki klob shabar ri.
