Shillong, Naitung 20
Ka Argentina ka la shah kynthoh jur namar ka jingpynjah burom ha ka rukom ïalehkai jong ka hadien ba ka la shah rem ha ka jingïalehkai phainal jong ka FIFA World Cup 2026, ha kaba ki rangïalehkai jong ka ki la phai da ka lyngkdong ha ka por ba ka Spain ka la pdiang ïa ka trophy nam lahduh bad ki nongkyrshan ki la pyrta ïa ka kyrteng u Lionel Messi katba u Rodri u la pdiang ïa ka khusnam Golden Ball.
Ha katei ka jingïakhun phainal ka Spain ka la lah ban pynliem ïa ka Argentina da 1-0 kol hadien ka ‘extra time’ ha ka lah sngi U Blei ha New Jersey Stadium kaba ha New York bad ïa kane ka kol la thep da u Ferran Torres ha ka minit kaba 106.
Hadien ba ki la pdiang ïa ki takma rupa, ki nongïalehkai ka Argentina kim shym la thap kti hadien ba ka Spain ka la pdiang ïa ka trophy nam lahduh. Ha ka jaka kata, u Lionel Messi bad ki paralok jong u ki la ïaid sha ka liang kaba kham jngai jong ka madan katba ka Spain ka dangpynkhreh ban pdiang ïa ka trophy nam lahduh jong ka World Cup.
Ka jingïakynad ka la nangjur shuh shuh haba u Rodri, u rangïalehkai shapdeng jong ka Spain, u la ïohpdiang ïa ka Golden Ball kum u rangïalehkai ba tbit tam jong kane ka lympung, ha kaba ki nongkyrshan jong ka Argentina kiba don hapoh ka stadium ki la pyrta ïa ka kyrteng jong u Messi ha ka por ba ai ïa katei ka trophy.
“Ym don kano kano ka kyrdan hapdeng jong ki bad ka la pynkyndit haduh katta katta. Ka la long ka jingjah burom ïa ka Argentina. Ki nongkyrshan, ngi dangpyrkhat ki la long kiba stad. Hynrei wat hapdeng ka jingsam ïa ka trophy sha u Rodri kum u rangïalehkai ba kynsai ha kane ka lympung, pynban ki nong-kyrshan ki la pyrta ïa ka kyrteng jong u Messi bad kumjuh ïa ka Argentina. Kim lah ban pdiang ba ka Argentina ka la shah rem ha ka final jong ka World Cup,” la ong u Adrian Durham uba long u nongpathai ïa ka jingïalehkai.
U Durham u la buh jingkylli halor ka rukom ïalehkai ka Argentina ha kane ka jingïakhun final kaba pynlyngngoh ïa baroh namar ka kynhun kaba la bat teng ïa ka nam lahduh ha ki saw snem mynshwa, ka la lah ban ïalehkai bha naduh kaba sdang kane ka lympung wat haduh ka semi final.
“Ka Argentina ka la pynjah burom ïa ka jingïalehkai, ka la pynjah burom ïa ka World Cup. Ha ka jingshisha, ki la long ka jingpynjah burom ha baroh ki liang bad kumjuh ruh naduh ki 20 minit pyrshah ïa ka England,” u la bynrap.
“Watla ka la jop da kaba suk ha ka jingïalehkai group, hynrei ka la ïakynduh jingeh ha ka jingïakhun pyrshah ïa ka Cape Verde, ka la lait thaw ban shah rem ha ka jingïakhun pyrshah ïa ka Egypt hashwa ba kan jop ïa ka Switzerland,” la bynrap u Durham.
“Ha ka jingshisha ka England ka la lah ban ïalehkai bha ha ka semi final, hynrei ka la shah rem noh ha ka Argentina, kaba la pynjah burom ïalade ha ka jingïakhun final,” u la bynrap.
Ka jingdiaw mynsiem ka Argentina ka dei hadien ka jingshah sei red card u Leandro Paredes hadien ba u la pynur ïa u rangïalehkai ka Spain u Eric Garcia bad u Gavi.
Kine ki kynhun kim shym la lah ban thep kol haduh kaba kut ki 90 minit. Ha ka jingshisha ka Spain ka la ïoh ïa ki kabu kiba biang, hynrei u Emiliano Martinez u la lah ban ïalehkai bha na ka bynta ka Argentina da kaba khanglad na ki jingpyrshang u Dani Olmo, Ferran Torres bad u Pau Cubarsi.
Hadien ba la kut ka jingïalehkai ka la don ka jingïajrong kti ban ïapyni bor iwei na iwei hapdeng ki para nongïalehkai, hynrei lait tang u Messi bad u Lamine Yamal kiba long kiba jai jai khlem da kwah ban ïadon bynta lang.
