Shillong, Naitung 21
Ka lympung ïalehkai State-Level Subroto Mukherjee Cup Tourna-ment 2026 ka la sdang ha ka sngi Ba-ar ha kane ka nongbah ha kaba la wan shim bynta da ki lahduh na ki district bapher bapher jong ka Jylla ha la ki jong ki kyrdan.
Ïa kane ka lympung la pynlong da ka tnat ïalehkai ka Sorkar Jylla ha kaba la phiah ha ki lai tylli ki kyrdan kata ka Under-15 Boys, Under-17 Boys bad ka Under-17 Girls ha kaba la pynïalehkai ha SSA Stadium, Polo; Madan Heh Minit Stadium Mawlai, bad ha madan Third Ground jong ka MFA ha Polo.
Ka jingpynlong ïa kane ka lympung manla u snem ka long ban sei ïa ki kynhun kiba kynsai kiba long ki lahduh ha kitei ki kyrdan ki ban mihkhmat ïa ka Jylla sha ka International Subroto Mukherjee Cup 2026 ka ban long ha ka nongbah Delhi bad Bangalore.
Haba phai sha ki jingïalehkai U-17 Boys ha kane ka sngi sdang ha madan Third Ground, ka Balang Mawlangwir HSS (South West Khasi Hills) ka la pynliem noh ïa ka Karukol HSS (South Garo Hills) da 3-2 kol, kumjuh ka O.M. Roy Memorial HSS (East Khasi Hills) ka la jop da 3-0 kol ïa ka Little Star Eng. Med. Sec. School (Eastern West Khasi Hills). Ka St. Paul HSS, Mangsang (East Garo Hills) ka la jop da 7-4 kol ïa ka Okkapara SS (South West Garo Hills). Ka Amwi HSS, Thangbuli (West Jaiñtia Hills) ka la pynliem noh ïa ka Govt. Boys HSS (West Garo Hills) da 1-0 kol.
Ha ka Under-17 Girls kaba la long ha Madan Heh, ka St. Claret SS (South West Garo Hills) ka la jop da 6-0 kol ïa ka Upper Kharkutta U.P.S (North Garo Hills), ka Nongjri Presbyterian SS (Ri-Bhoi) ka la pynliem da 1-0 kol ïa ka Lotus SS (East Jaiñtia Hills). Ka Lurmangkara SS (West Khasi Hills) ka la pynliem noh ïa ka Kasturba Gandhi BalikaVidyalaya (East Garo Hills) da 2-0 kol. Ka Little Star HSS (Eastern West Khasi Hills) ka la jop da 8-0 kol ïa ka Rangku Memorial Girls HSS (South Garo Hills).
Haba phai sha ka Under-15 Boys kaba la long ha SSA Stadium, ka Maharam Govt. HSS (South West Khasi Hills) bad ka Little Star English Medium SS (Eastern West Khasi Hills) ki la ïakhaid mar 2-2 kol. Ka Dilma Apal HSS (North Garo Hills) ka la jop da 3-0 kol ïa ka Baghmara Govt. HSS (South Garo Hills). Katba ka North Liberty HSS (West Jaiñtia Hillska la jop haduh 12-0 kol ïa ka Don Bosco HSS (West Garo Hills). Ka Myngken Christian HSS (Ri-Bhoi) bad ka Step by Step L.P.S, Wapung (East Jaiñtia Hills) ki la ïakhaid khlem da lah ban thep kol haduh kaba kut.
Kane ka lympung ka ban kut haduh ka sngi Saitjaiñ, kan bteng biang ha ka sngi Balang da ki jingïalehkai group hashwa ban jam sha ka semi final.
