Shillong, Naitung 21
Ka kynhun ïalehkai phutbol ka Spain ka la leit phai sha la ïing bad la pdiang burom ïa ki da kumba 2 million ki paidbah kiba la pyndap ïa ka surok hi baroh kawei.
Kine ki 26 ngut ki rangïalehkai ryngkat ki nongïarap jong ka kynhun ki la ïakynduh ïa u Myntri Rangbahduh u Pedro Sanchez ha ka lah sngi U Blei hadien ba ki la poi ha ka nongbah jong ka Spain hadien ba ka la lah ban pynliem noh ïa ka Argentina da 1-0 kol ha ka jingïakhun phainal jong ka World Cup ha New Jersey, United States.
“Khublei ïa ki coach bad ki nongïalehkai na ka bynta ka rukom ïalehkai, ka jingpyrshang, bad ka jingjop,” la ong u Sanchez. “Ngi la sakhi da ka jingkmen ïa kaei kaba phi la lah ban ïalehkai.”
Kane ka kynhun ka la shong ha tnum bus ha kaba ki la ïaid ha ryngkat ka jingsyrtap ki paidbah kiba la pyndap ïa ka surok hi baroh kawei ha Madrid. “Ki khlur ki tyngshaiñ lang” la thoh ha katei ka bus, ha kaba ki paidbah ki la shon dur ïa ki nongïalehkai phutbol.
Ki rangïalehkai ki la rah ïa ka trophy jong ka World Cup bad ki la phong ïa ki sopti ba la thoh “Somos Campeones” (Ngi dei ki nongjop). Ki la shad ryngkat ka jingkmen bad ki paidbah ha surok.
“Ka la long ka jingsarong ban mihkhmat ïa ka ri ha ryngkat ka jingkmen bad la ki nongkyrshan,” la ong u coach jong ka Spain, u Luis de la Fuente hashwa ban sdang ka jingïaid paidbah.
Katei ka kynhun ka la ïaid lyngba ki surok jong ka Madrid najan ka Moncloa Palace, ka jaka sah jong u myntri rangbahduh, sha ka Cibeles Square, ha kaba ki bor synshar ki la ïathuh ha ki lad pathai khubor ba ki don kumba 120,000 ngut ki briew ki ban ïalum lang ha ka jingleh burom na ka bynta katei ka kynhun.
“Nga dap da ka jingsngewkmen. Nga la thiah tang lai bad saw kynta, hynrei na ka bynta ka kynhun ngan ïakhun tyngeh,” la ong u rangïalehkai ba dang 19 snem ka rta u Victor Alvarez.
